Një aksident i rëndë automobilistik ka ndodhur në qytetin Malaga të Spanjës, ku kanë humbur jetën katër persona. Viktimat janë një nën-inspektor 48-vjeçar i Policisë Kombëtare Spanjolle dhe tre shtetas shqiptarë të dyshuar për përfshirje në një seri grabitjesh.
Ngjarja nisi pas një tentative për grabitje në një farmaci në lagjen Puerto de la Torre, ku tre persona të dyshuar si pjesë e një bande shqiptare tentuan të kryenin grabitjen, por dështuan dhe u larguan me shpejtësi në një automjet të fuqishëm. Policia i ndoqi menjëherë, por gjatë arratisjes grabitësit morën një kthesë të gabuar dhe u përplasën në mënyrë fatale me një automjet tjetër në autostradën A-7, në drejtim të Torremolinos.
Automjeti me të cilin po kthehej në shtëpi nën-inspektori spanjoll shpërtheu në flakë pas përplasjes. Edhe makina e të dyshuarve shqiptarë shpërtheu, duke bërë që të dyja automjetet të digjeshin plotësisht. Pavarësisht ndërhyrjes së shpejtë të zjarrfikësve nga disa stacione të rajonit, të katër personat humbën jetën.
Tre shqiptarët e dyshuar vdiqën në vend, ndërsa nën-inspektori u nxor nga automjeti nga policia lokale, por nuk mundi t’u mbijetonte plagëve të marra.
Nën-inspektori i ndjerë, Antonio Ramos, ishte baba i dy fëmijëve dhe kishte mbi 20 vite përvojë në shërbim. Ai nuk ishte pjesë e operacionit të ndjekjes, por po kthehej në shtëpi pas një turni nate.
Banda shqiptare ishte nën hetim prej muajsh dhe dyshohet për të paktën 10 grabitje të tjera në farmacitë dhe institucionet e zonës Costa del Sol, përfshirë qytetet Malaga, Marbella, Estepona dhe Benalmádena. Autoritetet spanjolle deklarojnë se banda kishte grabitur madje edhe një stacion zjarrfikësish për të marrë pajisje të specializuara për hapjen e kasafortave.
Në vendin e ngjarjes ndërhynë Garda Civile, Policia Kombëtare dhe shërbimet emergjente 061. Hetimet për aksidentin po drejtohen nga Departamenti i Trafikut i Gardës Civile.