Një avion ushtarak turk C-130 me të paktën 20 persona në bord është rrëzuar të martën në Gjeorgji, pak pas nisjes nga Azerbajxhani. Shkaku i aksidentit ende nuk dihet.
Pamjet e para nga vendngjarja pranë kufirit me Azerbajxhanin treguan copa metali të shtrembëruara të shpërndara mbi një kodër, disa pjesë të avionit ende në flakë dhe tym të zi që ngrihej në qiellin e pastër. Pamjet që po qarkullojnë në rrjetet sociale tregojnë avionin duke u rrotulluar në ajër dhe më pas duke shpërthyer në flakë pas rrëzimit në një zonë kodrinore.
Presidenti turk, Recep Tayyip Erdogan, ndërpreu një fjalim në Ankara për të shprehur ngushëllimet për “dëshmorët”, term që përdor shpesh për të përshkruar personelin ushtarak apo shërbimet e tjera të shtetit që humbin jetën gjatë detyrës. Ai tha:
“Me ndihmën e Zotit, do ta kapërcejmë këtë aksident me pasoja minimale. Zoti qoftë me shpirtrat e dëshmorëve tanë dhe le të jemi me ta me lutjet tona.”
Ministria turke e Mbrojtjes njoftoi se në bord ndodheshin 20 ushtarakë turq, përfshirë ekuipazhin, pa dhënë detaje për pasagjerët e mundshëm të kombësive të tjera. Ministritë e Turqisë dhe Gjeorgjisë po punojnë për të arritur vendin e rrëzimit, në komunën Sighnaghi të rajonit Kakheti, një zonë kufitare me pyje dhe kodra.
Ministri turk i Brendshëm, Ali Yerlikaya, bëri me dije se homologu i tij gjeorgjian, Gela Geladze, kishte mbërritur në vendngjarje rreth orës 17:00 lokale (14:00 GMT) dhe operacionet e kërkim-shpëtimit po vazhdojnë.
Azerbajxhani njoftoi se avionit i ishte bërë nisja nga qyteti i Ganja-s, ndërsa kompania amerikane Lockheed Martin, prodhuesi i avionit C-130 Hercules, shprehu ngushëllimet për Turqinë dhe familjarët e viktimave, duke premtuar mbështetje gjatë hetimeve.
Avioni C-130 Hercules është një transportues ushtarak me katër motorë turboprop, i përdorur gjerësisht nga forcat ajrore në shumë vende të botës për transport të trupave, pajisjeve dhe operacione të ndryshme ushtarake, duke përfshirë edhe misione dhe sulme ajrore. Ai mund të niset dhe të ulet edhe në pista të papërshtatshme, gjë që e bën një nga transportuesit më të rëndësishëm taktiko-ushtarak në botë. JOQ