Një nga figurat më ikonike të televizionit italian, Emilio Fede, është ndarë nga jeta në moshën 94-vjeçare, në azilin e pleqve “San Fedele” në Segrate, pranë Milanos.
Lajmi është konfirmuar nga familjarët dhe burime pranë qendrës ku ai po trajtohej.
Fede mbylli sytë përgjithmonë, duke pasur pranë vajzat e tij, Simona dhe Sveva, shkruajnë mediat italiane.
Emilio Fede ka lënë një gjurmë të thellë si drejtor dhe prezantues i lajmeve në rrjetin Mediaset, i themeluar nga ish-kryeministri i ndjerë Silvio Berlusconi.
I njohur për stilin e tij të drejtpërdrejtë dhe shpesh polemizues, Emilio Fede ishte një prej mbështetësve më të zjarrtë të Berlusconit në ekran.
Ai e ka drejtuar për vite me radhë edicionin informativ TG4, duke fituar vëmendjen publike si një figurë e përkushtuar ndaj kauzës politike dhe mediatike të ish-kryeministrit italian.
Lidhja e tij personale dhe profesionale me Berlusconin ishte aq e ngushtë, saqë ata bënin pushime bashkë deri në tre herë në vit, dhe shpesh ishin të pandarë në ambiente private dhe publike.
Pas daljes në pension, Fede u përfshi në një sërë problemesh ligjore, përfshirë edhe dënimin për përfshirje në skandalin e prostitucionit të mitur në vilën e Berlusconit në Arcore, një nga çështjet më të bujshme të viteve të fundit në Itali.
Mbështetja e tij e pakushtëzuar për Berlusconin në ekran shpesh është parë si propagandë mediatike, dhe është kritikuar ashpër nga forcat e qendrës së majtë në vend.
