Irani ka reaguar ashpër ndaj ultimatumit 48-orësh të presidentit amerikan Donald Trump, duke paralajmëruar pasoja të rënda dhe se do te ndezin ‘ferrin’ mbi Toke në rast të një përshkallëzimi të mëtejshëm ushtarak nga SHBA dhe Izraeli.
Një përfaqësues i komandës ushtarake Khatam al-Anbiya deklaroi se çdo zgjerim i konfliktit do të çojë në destabilizim të gjerë të rajonit.
“Mos harroni se nëse agresioni zgjerohet, e gjithë rajoni do të kthehet në ferr për ju”, u shpreh ai, duke shtuar se ideja për mposhtjen e Republikës Islamike të Iranit është një “iluzion”.
Reagimi i Teheranit vjen pas ultimatumit të shpallur nga presidenti amerikan. Në një postim në platformën Truth Social, Donald Trump deklaroi: “Do të mbani mend kur i dhashë Iranit 10 ditë për të bërë marrëveshje ose për të rihapur Ngushticën e Hormuzit. Koha po mbaron – 48 orë para se të shpërthejë ferri mbi ta”.
Ultimatumi lidhet me kërkesën e Uashingtonit për rihapjen e Ngushticës së Hormuzit, një korridor kyç për tregtinë globale të energjisë, i cili është bllokuar nga Irani që nga fillimi i konfliktit.
Në të njëjtën kohë, përplasjet po shtrihen edhe në fronte të tjera. Rebelët Houthi në Jemen njoftuan se kanë ndërmarrë një sulm me raketa ndaj Izraelit, duke shënjestruar aeroportin Ben Gurion dhe objekte ushtarake në jug të vendit, duke përdorur një raketë balistike dhe disa mjete ajrore pa pilot.
Ushtria izraelite konfirmoi se ka identifikuar një raketë të lëshuar nga Jemeni dhe ka aktivizuar sistemet e mbrojtjes ajrore. Sipas mediave izraelite, raketa ra në një zonë të hapur pa shkaktuar viktima apo dëme.
Zhvillimet e fundit tregojnë një rritje të ndjeshme të tensioneve në rajon, ndërsa paralajmërimet dhe kundërpërgjigjet mes palëve po shtojnë rrezikun për një përshkallëzim më të gjerë të konfliktit.
Comments are closed.