Një gazetar është dhunuar fizikisht nga disa persona mbrëmjen e sotme në Shkodër, rreth orës 20:00.
Sipas raportimeve, gazetari Ervin Dushi pretendon se është dhunuar nga shtetasi Prek Gjoni, i cili sipas Dushit është pronar i rrjetit të marketeve “Xhedis”, si dhe me disa persona të tjerë që ndodheshin në shoqërinë e tij në momentin e incidentit.
Gazetari Dushi shprehet se konflikti dhe dhuna ndaj tij kanë ardhur si pasojë e një denoncimi të mëparshëm që ai ka bërë në mbështetje të një punonjëseje të një prej marketeve të administruara nga Gjoni, e cila, sipas tij, kishte pasur një mosmarrëveshje me pronarin.
Pas ngjarjes, Dushi ka bërë kallëzim në Policinë e Shkodrës, ndërsa ka deklaruar se çështjen do ta ndjekë më tej përmes institucioneve ligjore.
