Shefja e kabinetit të kryeministrit Edi Rama, Vali Bizhga, ka dhënë dorëheqjen. Ajo është zëvendësuar në detyrën e shefes së kabinetit të kreut të qeverisë nga Vilma Premti, më herët shefe e kabinetit të Holta Zaçajt, kryetares së Gjykatës Kushtetuese. Bizhga ka qëndruar pranë administratës së Edi Ramës që prej kohës kur ai drejtonte Bashkinë e Tiranës. Ajo ka mbajtur një profil të ulët publik, ndërsa është konsideruar krahu i djathtë i kryeministrit. Ajo mori postin e drejtoreshës së kabinetit të Këshillit të Ministrave në vitin 2013. Në atë kohë, siç e zbuloi vetë Rama, Bizhga kishte kaluar një betejë të vështirë me kancerin, por kishte arritur ta fitonte atë. Sa i përket Vilma Premtit, ajo prej shkurtit të vitit 2022 deri në vitin 2023, ka qenë Drejtore e Kabinetit të Ministres së Shtetit për Marrëdhëniet me Parlamentin, Elisa Spiropali. Ndërsa nga viti 2023 deri në vitin 2025, Vilma Premti ka qenë shefe e kabinetit të kryetares së Gjykatës Kushtetuese, Holta Zaçaj.
Por kush është Vali Bizhga?
Vali Bizhga ka qenë gjithmonë pas kryeministrit Rama, që në kohën kur ky i fundit drejtonte Bashkinë e Tiranës. Kur Rama drejtonte Bashkinë e Tiranës, Bizhga ishte në rolin e zv/kryetares. Më pas, ajo vendosi të tërhiqej për t’u kthyer në vitin 2013 dhe këtë herë si drejtoreshë e Këshillit të Ministrave, detyrë nga e cila tashmë ka dhënë dorëheqjen. “Është kënaqësi dhe nder t’ju prezantoj drejtoren e kabinetit tim në Kryeministri, Vali Bizhgën. Me Valin kemi punuar krah për krah për shumë vite në Bashkinë e Tiranës, ku kam pasur privilegjin ta kem zëvendësen time dhe më pas drejtore të kabinetit të kryetarit të Bashkisë.
Por kemi ndarë së bashku edhe përpjekjet dhe emocionet e disa fushatave, ku Vali ka luajtur prapa kuintave rolin kyç të drejtorit ekzekutiv të fushatës. Një betejë më e rëndësishme për të, ajo me një kancer të shfaqur befas në formë agresive, e shkëputi lidhjen tonë të punës, për aq sa kohë iu desh Valit ta fitonte betejën më të vështirë të jetës së vet. Tashmë, ajo është rikthyer në fushën e kahershme të përpjekjes sonë të përbashkët për të bërë punë të mira për vendin e njerëzit, e do të mbulojë me profesionalizmin, pastërtinë dhe përkushtimin e saj të posaçëm në komunikimin me njerëzit, një detyrë ku pa asnjë dyshim do vendosë një standard të ri”, shkruante Rama kur e emëroi.
Çfarë është publikuar për Bizhgën?
Kur u vu në pranga ish-Drejtori i Burgjeve Arben Çuko, “Zëri i Amerikës” publikoi përgjimet e dosjes, mes të cilave ishte edhe një vend pune i porositur nga Vali Bizhga. Biseda e përgjuar kishte në fokus punësimin e një vajze. “Fola me zonjën Bizhga para gjysmë orë dhe i thashë se u fut Vitjona në punë”, citohej të thoshte Çuko në përgjimin e zbardhur. Këtë punësim, Bizhga e shpjegoi duke thënë se ishte ndjerë keq dhe e kishte ndërmjetësuar rastin pas një kërkese për ndihmë nga motrat e Nënë Terezës. “Arsyeja lidhej me babanë e saj, i cili kishte qenë punonjës i Burgjeve dhe kishte humbur jetën në aksident.
Gjatë ceremonisë mortore, shokët e të atit i kishin premtuar asaj vendin e tij në burgun e Fushë-Krujës. Ajo nuk është pranuar në punë pa konkurs dhe zotit Çuko nuk i është thënë që do ta fusësh në punë. Është e vërtetë që ajo është aksesuar në konkurs, por ftesa për konkurs u drejtohet të gjithëve”, tha Bizhga disa vite më parë. Pas publikimit të këtyre përgjimeve, kryeministri Rama e quajti “kazan” Zërin e Amerikës. “Erdhi dita që Zëri i Amerikës të flasë nga kazani i Tiranës duke përgojuar dynjanë mbi bazë logjesh telefonike”, shprehej Rama.
