Kryeministri Edi Rama ka komentuar vendimin e Gjykatës Kushtetuese lidhur me çështjen e kryebashkiakut të Tiranës, Erion Veliaj.
Në një reagim në X, Rama u shpreh se vendimi provon se “nuk i paskam kapur unë të tëra pushtetet”.
Duke iu referuar situatës në Tiranë, ai theksoi se nëse kryeqyteti nuk do të ketë zgjedhje deri në vitin 2027 dhe Gjykata Kushtetuese mendon se kryebashkiaku nuk mund të largohet veçse me zgjedhje, atëherë “mbajtja e tij në qeli nuk është më thjesht në dëm të lirive individuale, por edhe e drejtës kushtetuese të qytetarëve për t’u qeverisur nga i zgjedhuri i tyre”.
Rama shtoi se çdo njeri që e sheh qëndrimin e Kushtetueses si parimor dhe jo si kundërshti ndaj qeverisë, duhet të presë që “me të njëjtën parimësi, kur të shqyrtohet çështja e paraburgimit, Gjykata Kushtetuese ta kthejë Erion Veliajn në detyrë për të vijuar procesin gjyqësor në gjendje të lirë”.
Disa rrjedhime logjike nga vendimi i Gjykatës Kushtetuese:
1. Ja që edhe njëherë u provua se nuk i paskam kapur unë të tëra pushtetet dhe kjo është një gjë sa e qartë, aq edhe e mirë apo jo
2. Nëse Tirana nuk do të ketë zgjedhje deri në 2027-ën dhe Kushtetuesja mendon se kryebashkiaku i burgosur i Tiranës nuk mund të largohet përveçse me zgjedhje, atëherë disproporcioni i mbajtjes së tij në qeli nuk është më thjesht në dëm të lirive e të drejtave kushtetuese të personit, po edhe në dëm të së drejtës kushtetuese të popullit të kryeqytetit për t’u shërbyer nga i zgjedhuri i vet apo jo.
3. Çdo njeri normal që nuk sheh tek qëndrimi i Kushtetueses një qëndrim të verbër kundër qeverisë në dëm të madh të Tiranës, po një qëndrim të vendosur parimor, nuk ka se si të mos presë që me të njëjtën parimësi, kur të gjykojë paraburgimin e tij, Kushtetuesja ta kthejë Erion Veliajn në detyrë, për të vijuar procesin gjyqësor në gjendje të lirë apo jo Pika 1 dhe 2 janë të sigurta, pika 3 mbetet për t’u parë, ndërkohë le të urojmë që kushdo ka në dorë ta ndihmojë zgjidhjen e këtij ngërçi absurd, të kujtohet se kryeqytetI nuk mund të trajtohet si jetim, për vite me radhë.