Pas mbledhjes së kryesisë së Partis Demokratike, ish-kryeministri Sali Berisha deklaroi se kjo forcë politike ka vendosur të mbështesë kandidatë të pavarur në zgjedhjet e pjesshme lokale. Ky vendim vlen jo vetëm për Bashkinë e Tiranës, por edhe për pesë bashkitë e tjera ku do të mbahen zgjedhje.
Në një deklaratë për mediat, Berisha theksoi se megjithëse PD ka kandidatë të kalibrit të lartë, ajo vlerëson shumë kandidaturat e pavarura, duke i konsideruar si më të suksesshmet në historinë e modeleve elektorale.
Pse po mbështeten kandidatët e pavarur?
Berisha e cilësoi vendimin si një hap të rëndësishëm, i cili synon të bashkojë të gjitha forcat opozitare. Ai tha se kjo qasje ofron një mundësi për çdo qytetar, specialist apo ekspert që është i gatshëm të përballet me “narkoshtetin e Ramës”.
Sipas tij, kandidatët e pavarur, të mbështetur nga forcat politike, kanë arritur suksese të papritura në të kaluarën. Ky model, sipas Berishës, është një rrugë për të maksimizuar shanset për fitore.
“Kandidati i pavarur është i pavarur kur deklaron veten por edhe të propozuar, asgjë nuk do lihet jashtë konsideratës,” shtoi ai, duke lënë të hapur mundësinë e bashkëpunimit me individë nga forca të ndryshme politike dhe shoqëria civile.
