Aktori i njohur Rezart Veleshnja ka reaguar me tone mjaft të ashpra pas ceremonisë mortore të këngëtarit Shpat Kasapi, duke drejtuar akuza të forta drejt institucioneve shtetërore të Maqedonisë së Veriut për diskriminim.
Fillimisht, aktori ndau një video homazh për mikun e tij të ndjerë, duke shkruar: “Mbi 3 mijë njerëz për ty o vllai im Shpat. Kaq zemër të mirë kishe.”
Por dhimbja ia ka lënë vendin revoltës kur ka vënë re mungesën e nderimeve shtetërore, duke bërë një krahasim të drejtpërdrejtë me rastin e këngëtarit maqedonas, Tose Proeski.
Veleshnja nuk i kurseu fjalët e rënda në reagimin e tij publik: “Një shtet që s’mundesh as shtet t’i thuash! Turp e faqja e zezë, diskriminim në maksimum. Maqedonasit për Tose Proeskin e shpallën ditë zie, ndërsa për Shpat Kasapin qëndruan indiferent vetëm se ai është shqiptar! Turp t’kenë!”
Vlen të theksohet se pas reagimeve të shumta, Komuna e Tetovës njoftoi se dita e nesërme, 1 dhjetor, do të shpallet ditë zie në nder të artistit, ndërsa heshtja nga niveli qendror shtetëror vazhdon të jetë objekt kritikash.
