“Ja e vërteta e projektit”, Rama reagon pas dhunës në protestën në Zvërnec: Jam po aq i revoltuar sa qytetarët. Toka u është blerë pronarëve, investim 4 miliardë euro
Kryeministri Edi Rama ka reaguar pas ngjarjes së ndodhur në Portonovë të Zvërnecit, ku një protestë kundër projektit që do të ndërtohet në zonë përfundoi me përplasje dhe me tërheqjen zvarrë të një protestuesi nga punonjës të një kompanie private sigurimi.
Ai e cilësoi incidentin të papranueshëm dhe tha se Policia e Shtetit duhej të kishte ndërhyrë menjëherë për të arrestuar autorët.
“Jam njësoj i revoltuar si qytetarët. Dhuna nuk ka vend në një vend demokratik dhe nuk mund të tolerohet”, u shpreh Rama.
Kryeministri tha se investimi nuk lidhet me tokë shtetërore, por me prona private të blera nga investitorët sipas ligjit. Ai kujtoi se administrata shqiptare ka refuzuar projekte të mëparshme për mungesë standardesh, duke kërkuar nivele më të larta për mbrojtjen e mjedisit dhe zhvillimin e qëndrueshëm.
“Nuk ka asnjë metër tokë shtetërore. Ky është investim privat, i kontraktuar sipas ligjit, dhe ne kemi kërkuar standarde më të larta për çdo projekt”, deklaroi Rama.
Sipas tij, bëhet fjalë për një investim prej 4 miliardë eurosh, i cili synon të sjellë standarde të larta në turizëm dhe ta vendosë Shqipërinë në elitën e destinacioneve globale.
“Ky projekt është pjesë e përpjekjes për ta vendosur Shqipërinë në hartën e destinacioneve më të lakmuara në rajon. Ne duam që flamuri ynë të ketë vlerë në sytë e botës dhe që çdo shqiptar të ndihet krenar”, tha ai.
“Laguna nuk preket”, Rama për Zvërnecin: Çfarë më thanë investitorët amerikanë
Kryeministri Edi Rama ka folur për projektin e zhvillimit në zonën e Zvërnecit dhe Pishporos, duke theksuar se ai do të realizohet në përputhje të plotë me ligjin dhe standardet mjedisore, me fokus ruajtjen e biodiversitetit dhe lagunës.
Sipas tij, zona në fjalë është një peizazh i mbrojtur i kategorisë së pestë sipas klasifikimit të IUCN, ku lejohet bashkëjetesa mes zhvillimit njerëzor dhe natyrës.
Rama tha se projekti do të jetë i detyruar të respektojë një brez mbrojtës përgjatë bregdetit dhe lagunës me qëllim ruajtjen e peizazhit dhe biodiversitetit.
Ai shtoi se Këshilli Kombëtar i Territorit ka ngritur grupe pune për të garantuar zbatimin e kritereve mjedisore dhe zhvillimore në zonë, duke përfshirë edhe mbrojtjen e biodiversitetit të ujit dhe lagunës.
Projekti në Zvërnec, Rama: Nuk rri në karrige me forcë nëse qytetarët s’e duan vizionin tim. Më thoni ju si do veprojmë
Kryeministri Edi Rama deklaroi se nuk do të qëndrojë në detyrë nëse qytetarët nuk mbështesin vizionin e tij për zhvillimin e vendit.
Ai tha se është i gatshëm të dëgjojë çdo kritikë dhe kundërshti, por theksoi se marrëveshja e tij është me qytetarët dhe se janë ata që vendosin nëse do të mbështesin apo jo vizionin e tij për Shqipërinë.
Rama paralajmëroi se largimi i investitorëve strategjikë do të kishte pasoja për zhvillimin ekonomik dhe turistik të vendit, duke ulur interesin ndërkombëtar për Shqipërinë.
“Ju kanë kthyer në pjesë të një kurthi”/ Rama rikujton filmin me De Niron dhe Hoffman: Përdorën median për të fabrikuar një luftë SHBA-Shqipëri
Kryeministri Edi Rama ka reaguar për protestat e mbajtura dhe ato të paralajmëruara kundër investimeve në zonën e Zvërnecit.
Duke iu referuar ngjarjeve të 30 majit, Rama tha se një pjesë e opinionit publik është bërë pjesë e një kurthi që, sipas tij, dëmton të ardhmen e Shqipërisë.
Ai solli në vëmendje filmin “Wag the Dog” me Robert De Niron dhe Dustin Hoffman, ku fabrikohet një konflikt mes Shteteve të Bashkuara dhe Shqipërisë për të manipuluar opinionin publik.
Sipas kryeministrit, në epokën e rrjeteve sociale, narrativa të tilla përhapen me shpejtësi dhe ndikojnë në perceptimin e njerëzve.
Projekti në Zvërnec, Rama: Po sulmohet nga forca të brendshme dhe të jashtme që nuk e duan Shqipërinë në këtë nivel zhvillimi
Kryeministri deklaroi se e drejta për protestë është e pacenueshme, por sipas tij sulmet ndaj projektit nuk vijnë vetëm nga shqetësime lokale.
Ai tha se Shqipëria ndodhet në një fazë të re zhvillimi dhe se projekte të tilla strategjike e çojnë vendin në një nivel tjetër ekonomik dhe turistik.
Sipas Ramës, kundërshtimi ndaj këtyre investimeve mbështetet edhe nga interesa të brendshme dhe të jashtme që nuk e duan Shqipërinë si një destinacion konkurrues në rajon dhe më gjerë.
Ai pranoi se sjellja e kompanisë private të sigurisë ishte e papranueshme, ashtu si edhe reagimi i Policisë së Vlorës, për të cilin tha se janë marrë masa të menjëhershme.
Projekti në Sazan, Rama: Administrata shqiptare e ktheu mbrapsht projektin e mëparshëm, kërkuam standarde më të larta
Kryeministri Edi Rama deklaroi se një nga çështjet kryesore që lidhet me projektin është ajo e pronësisë së tokës.
Ai theksoi se nuk ekziston tokë shtetërore që mund të vihet në dispozicion të investimit pa marrëveshje me pronarët privatë dhe se çdo procedurë po ndiqet sipas ligjit.
Rama shtoi se investitorët kanë angazhuar ekspertë ndërkombëtarë në arkitekturë, inxhinieri, mjedis dhe aspektet juridike të projektit.
Ai nënvizoi se administrata shqiptare ka rrëzuar projekte të mëparshme për të kërkuar standarde më të larta dhe se imazhet e publikuara nuk përfaqësojnë variantin përfundimtar të investimit.
“Unë tradhtoj Atdheun dhe mediat greke ju mbrojnë?!”/ Rama: Si mund të ndodhë kjo?! Ju kanë manipuluar duke shfrytëzuar atdhetarinë
Kryeministri reagoi edhe ndaj pasqyrimit të ngjarjes në mediat greke dhe deklaratës së Ministrisë së Jashtme të Greqisë.
Sipas tij, qytetarët janë manipuluar duke u prekur në ndjenjat patriotike dhe duke u bindur për narrativa që nuk përputhen me realitetin.
Rama tha se ndërhyrje të tilla nuk ndihmojnë marrëdhëniet mes dy vendeve dhe se debati duhet të mbështetet te faktet.
Rama: Investim 4 miliardë euro, Shqipëria synon elitën e turizmit global. Mbrojmë investimet strategjike dhe partnerët ndërkombëtarë
Kryeministri deklaroi se Shqipëria po kalon një fazë transformimi të rëndësishëm në sektorin e turizmit dhe se vendi synon të bëhet pjesë e elitës globale të destinacioneve turistike.
Ai e cilësoi projektin në Zvërnec si një investim strategjik me vlerë të lartë ekonomike dhe tha se pas tij qëndrojnë partnerë ndërkombëtarë seriozë dhe të verifikuar.
Rama shtoi se investimi nuk ka ardhur nga aktorë të rastësishëm, por nga partnerë të rëndësishëm ndërkombëtarë, duke përmendur edhe Katarin si një nga vendet e përfshira.
Tërhoqën zvarrë protestuesin, Rama reagon për ngjarjen në Zvërnec: Njësoj i revoltuar si qytetarët. Policia e Shtetit duhet t’i kishte arrestuar në vend rojet private
Kryeministri Edi Rama reagoi lidhur me situatën e krijuar në zonën e Zvërnecit, ku një protestues u tërhoq zvarrë nga punonjës të sigurisë private pas protestës së zhvilluar kundër projektit.
Në një mesazh drejtuar qytetarëve, ai tha se i kupton shqetësimet dhe zemërimin e tyre, ndërsa dënoi edhe reagimin e Policisë së Shtetit.
Rama deklaroi se policia duhej t’i kishte arrestuar në vend personat që ushtruan dhunë ndaj protestuesit.
Ai hodhi poshtë gjithashtu pretendimet se qeveria po fal toka publike për investitorët e huaj, duke theksuar se bëhet fjalë për prona private dhe për një projekt që, sipas tij, do t’i shërbejë zhvillimit afatgjatë të vendit.
“Është detyra ime të mendoj për të ardhmen e Shqipërisë. Investimet madhore i shërbejnë të ardhmes së fëmijëve tanë”, u shpreh kryeministri.
Comments are closed.