Besjan Kadiu është emri që po qarkullon gjithnjë e më shumë në qarqet politike si kandidati i mundshëm për të marrë drejtimin e Ministrisë së Infrastrukturës dhe Energjisë, në një moment delikat për këtë institucion kyç të qeverisë.
Sipas burimeve politike, Kadiu pritet të zëvendësojë Belinda Balluku, e cila aktualisht ndodhet nën hetim nga SPAK për akuzën e shkeljes së barazisë në tendera.
Besjan Kadiu mban aktualisht postin e zëvendësministrit në Ministria e Infrastrukturës dhe Energjisë, një funksion që e ka vendosur atë prej kohësh në qendër të vendimmarrjes për projektet strategjike të infrastrukturës, energjisë dhe investimeve publike.
Përvoja e tij në këtë institucion shihet nga mbështetësit si një avantazh i rëndësishëm, pasi garanton vazhdimësi dhe njohje të thellë të dosjeve më sensitive që lidhen me zhvillimin ekonomik të vendit.
Emërimi i mundshëm i Kadiut vjen në një periudhë kur Ministria e Infrastrukturës dhe Energjisë konsiderohet një nga dikasteret më të rëndësishme në vend, për shkak të peshës që ka në menaxhimin e projekteve të mëdha publike, tenderave dhe fondeve shtetërore.
Pikërisht për këtë arsye, çdo zhvillim që lidhet me drejtimin e saj ka tërhequr vëmendjen e opinionit publik dhe mediave.
Hetimi ndaj Ballukut nga SPAK ka shtuar presionin politik dhe institucional, duke nxitur diskutime për nevojën e ndryshimeve të shpejta në drejtimin e ministrisë.
Në këtë kontekst, emri i Besjan Kadiut po shihet si një zgjidhje “e brendshme”, që synon stabilitet dhe shmangie të tronditjeve të mëtejshme në administrim.
Megjithatë, deri më tani nuk ka një konfirmim zyrtar nga qeveria lidhur me këtë lëvizje.
Pritet që ditët në vijim të sjellin më shumë qartësi mbi fatin e drejtimit të Ministrisë së Infrastrukturës dhe Energjisë dhe rolin që Besjan Kadiu mund të marrë në krye të saj.
Comments are closed.