Një ngjarje e rëndë është regjistruar në zonën e Bathores ditën e sotme (19 tetor), ku dy vëllezër janë vrarë me armë zjarri dhe një person tjetër ka mbetur i plagosur. Autori i dyshuar, Ngushëllim Manzi, është arrestuar nga policia.
Ngjarja ka ndodhur pranë repartit ushtarak të Zall-Herrit, pas një konflikti.
Viktimat janë identifikuar si Selam Islamaj dhe Nazmi Islamaj, ndërsa Shefqet Islamaj ka mbetur i plagosur dhe është dërguar për ndihmë mjekësore.
Sipas informacioneve të gazetares Xhensila Kodra, autori i dyshuar, Ngushëllim Manzi, është ushtarak dhe është arrestuar pas ngjarjes.
Deri më tani, rrethanat e konfliktit nuk janë sqaruar plotësisht. Autori dyshohet se ndodhet në gjendje të rënduar psikologjike dhe nuk ka dhënë ende deklarime për ngjarjen.
Policia dhe grupi hetimor po punojnë për të zbardhur shkaqet e konfliktit, dinamikën e vrasjes dhe rrethanat që çuan në përdorimin e armës së zjarrit.
Hetimet vijojnë për dokumentimin e plotë të ngjarjes së rëndë që tronditi zonën e Bathores në Kamëz.
