Pamjet filmike dokumentojnë sekondat që rezultuan fatale për të riun, duke zbardhur hap pas hapi dinamikën e përplasjes së dhunshme.
Sipas videos, gjithçka nis në momentin kur Egli Pashollari ndalon automjetin në mes të rrugës dhe zbret prej tij. Në ato çaste, drejt tij afrohet Gazment Buçpapaj.
Mes tyre nis një përplasje fizike, e cila përshkallëzohet me shpejtësi. Në kulmin e përleshjes, dyshohet se 40-vjeçari i ka ngulur thikën 31-vjeçarit.
Në ato momente, një person i tretë, i paidentifikuar nëse kalimtar apo i njohur i viktimës, shihet teksa vrapon drejt tyre dhe ndërhyn për t’i ndarë. Ai përpiqet të largojë agresorin dhe të shuajë konfliktin.
Por përplasja nuk ndalet aty. Në skenë futet edhe bashkëshortja e Gazment Bucpapajt, e cila ndërhyn fizikisht duke goditur 31-vjeçarin. Dhuna vijon për disa sekonda të tjera, ndërsa personi i tretë, i cili mban veshur një xhaketë me kapuç gri, arrin më në fund të tërheqë Gazment Bucpapajn nga vendi i ngjarjes.
Në pamje shihet Egli Pashollari me bluzën e grisur në pjesën e pasme të shpinës, çka dyshohet se lidhet me plagën e marrë nga mjeti prerës. Teksa Pashollari ulet në tokë dhe më pas çohet sërish, Buçpapaj merr bashkëshorten dhe largohet me shpejtësi në rrugicat e zonës së Ish-Parkut, duke u zhdukur nga vendngjarja.
Për 31-vjeçarin, ato ishin sekondat vendimtare që do t’i merrnin jetën. Ndonëse ambulanca mbërriti me urgjencë, i riu nuk arriti t’i mbijetojë plagës së marrë dhe fatkeqësisht humbi jetën gjatë rrugës për në spital.
Comments are closed.