Një shpërthim me tritol u regjistrua gjatë orëve të mbrëmjes të së mërkurës brenda rrethimit të burgut të Fushë-Krujës. Ngjarja u shënua rreth orës 22:45, ku dyshohet deri më tani se autori e hodhi lëndën plasëse nga jashtë oborrit.
Fatmirësisht si pasojë e shpërthimit nuk pati të lënduar apo dëme materiale, ndërkohë që burime për mediat bëjnë me dije se hetimet janë përqëndruar në dy pista kryesore, ajo e arratisjes dhe mos vallë ishte një mesazh për drejtuesit e burgut.
Ndërkohë që këtë të enjte janë thirrur dy nga grupet e gatshme dhe pritet që në orët në vijim të ketë një aksion kontrolli në burg nga Drejtoria e Përgjithshme e Burgjeve.
Mësohet se në këtë institucion po vuajnë dënimin mbi 350 persona, ndërkohë që vetëm pak prej tyre ndodhen në sigurinë e lartë.
Ashtu sikurse njoftuam dhe më herët, lënda plasëse dyshohet të jetë hedhur pranë gjeneratorit të burgut që ndodhet jashtë perimetrit të sigurisë, ndërsa shpërthimi është dëgjuar rreth 5 kilometra në distancë nga vendi i ngjarjes. Lënda shpërthyese mësohet të ketë qenë artizanale e krijuar me nitrat.
Gjithashtu është bërë kqyrja e kamerave të sigurisë të vendosura në IEVP Fushë-Krujë për të konstatuar çdo lëvizje të dyshimtë të kryer brenda perimetrit të burgut, ndërkohë që theksojmë se në vendin ku autori hodhi lëndën plasëse nuk ka survejim të mirë me kamera sigurie.
“Krujë/Informacion paraprak. Rreth orës 22:45, ka ardhur një telefonatë në sallën operative të DVP Tiranë, se është dëgjuar një shpërthim brenda perimetrit të IEVP Fushë-Krujë.
Nga shpërthimi nuk ka persona të lënduar dhe as dëme materiale. Grupi hetimor dhe shërbimet e Policisë ndodhen në vendngjarje dhe po punojnë për sqarimin e rrethanave të rastit dhe përcaktimin e llojit të shpërthimit”, njoftoi më herët policia.