Dy persona kanë humbur jetën pasi një avion i vogël u rrëzua në një zonë banimi në qytetin Limburgerhof, në jugperëndim të vendit.
Sipas autoriteteve lokale, aksidenti ndodhi rreth orës 11:30 me kohën lokale, kur avioni u rrëzua mbi një lagje banimi, duke shkaktuar dëme edhe në një shtëpi.
Zëdhënësi i policisë, Thorsten Mischler, konfirmoi se dy personat që ndodheshin në bord kanë humbur jetën, ndërsa aktualisht nuk ka raportime për banorë të lënduar rëndë.
Megjithatë, sipas transmetuesit publik SWR, një person tjetër mund të ketë mbetur i lënduar.
Dëshmitarë në zonë kanë deklaruar se avioni duket se ka shpërthyer në ajër para se të binte, ndërsa mbetje të tij janë shpërndarë në një zonë të gjerë përreth vendit të ngjarjes.
Forca të shumta policie dhe ekipe emergjente janë angazhuar në terren, ndërsa zona e rrëzimit është rrethuar dhe po mbahet nën kontroll.
Autoritetet gjermane kanë nisur hetimet për të zbuluar shkaqet e aksidentit, ndërsa një helikopter policie është përdorur për fotografime ajrore dhe dokumentimin e vendit të ngjarjes.
