Një ndjekje spektakolare, e ngjashme me skenat e filmave aksion, është regjistruar pasditen e kësaj të shtune në Durrës, ku një 35-vjeçar i dehur me automjet pa targa ka sfiduar për më shumë se 30 minuta forcat e policisë.
Sipas raportimeve, gjithçka nisi kur efektivët e Policisë Rrugore i bënë shenjë drejtuesit të mjetit të ndalonte për kontroll, por ai refuzoi urdhrin dhe u largua me shpejtësi të lartë.
Për disa kilometra, patrullat e policisë dhe forcat “Shqiponja” u vunë në ndjekje të automjetit, ndërsa 35-vjeçari kryente manovra të rrezikshme në rrugë, duke rrezikuar drejtuesit e tjerë të mjeteve dhe kalimtarët.
Burime për mediat bëjnë me dije se i riu ka refuzuar disa herë t’u bindet thirrjeve të efektivëve për të hapur krahun dhe ndaluar mjetin.
Ndjekja mori fund pranë zonës së Shën Vlashit, ku policia, për të shmangur pasoja më të rënda, u detyrua të godiste automjetin e tij dhe ta neutralizonte.
Menjëherë pas ndalimit të mjetit, 35-vjeçari u vu në pranga nga forcat “Shqiponja”, ndërsa ndaj tij pritet të ngrihen disa akuza.