Avokati Spartak Ngjela ka bërë një analizë të situatës politike në vend, duke u ndalur si te gjendja e opozitës, ashtu edhe te reagimet e fundit të kryeministrit Edi Rama përballë protestave në Tiranë. Sipas tij, Shqipëria po kalon një moment të veçantë politik, ndërsa zhvillimet e ardhshme mund të sjellin lëvizje të rëndësishme në skenën politike.
Duke komentuar opozitën, Ngjela u shpreh se Partia Demokratike vazhdon të mbetet e dobët dhe se përgjegjësinë kryesore për këtë situatë e mban vetë ajo. Sipas tij, një pjesë e elektoratit nuk arrin të identifikohet me opozitën aktuale, ndërsa theksoi se statusi “non-grata” i Sali Berishës në Shtetet e Bashkuara të Amerikës dhe në Britaninë e Madhe ka ndikuar negativisht në forcimin e së djathtës shqiptare.
“Kot lodheni me sondazhet, sepse Partia Demokratike është shumë e dobët. Dhe, vetë Partia Demokratike e ka fajin. Shqiptarët, në këtë situatë politike në të cilën ndodhet sot Shqipëria, nuk mund të votojnë dot për Partinë Demokratike, sepse kryetari i saj, Sali Berisha, është non-grata në Shtetet e Bashkuara të Amerikës, por edhe në Britani. Koha ka ngrirë për të djathtën në Shqipëri. Të shohim sesi do të precipitojë ngjarjet, por, gjithsesi, na duhet të themi se Shqipëria sot është pa opozitë”, u shpreh Spartak Ngjela
Rama në panik
Në analizën e tij, Ngjela u ndal edhe te qëndrimi i kryeministrit Edi Rama përballë protestave të studentëve në Tiranë. Ai tha se nga mënyra se si u shfaq dhe foli kreu i qeverisë, krijohej përshtypja se ishte i shqetësuar nga revolta dhe kërkesat e protestuesve. Sipas Ngjelës, Rama tentoi të shfaqte forcë në deklaratat e tij publike, por ai mendon se në komunikimin e kryeministrit vihej re një ndjenjë pasigurie. Avokati ngriti pyetjen se përse një kryeministër që gëzon një shumicë të fortë politike do të shfaqte shenja shqetësimi, duke lënë të kuptohet se protestat dhe pakënaqësitë qytetare mund të kenë krijuar një klimë të re politike. Avokati hodhi idenë se Tirana mund të hyjë në një periudhë që ai e cilësoi si fazë të “pulsacioneve të forta demokratike”, duke paralajmëruar se ditët në vijim mund të jenë të rëndësishme për zhvillimet politike në vend. Sipas tij, shenjat tregojnë për një klimë të re debati dhe përplasjeje politike, e cila mund të ndikojë në të ardhmen e qeverisjes dhe të opozitës në Shqipëri. “Kryeministri Edi Rama ashtu siç foli sot, kuptohej se ai ishte i trembur nga revolta e studentëve në Tiranë, që kërkuan rrëzimin e tij. Rama nuk po dinte se çfarë të fliste; por donte të tregonte forcë, kurse zëri i tij tregonte se ai ishte i trembur. Nga kush ka frikë Edi Rama, se ai është sot një kryeministër absolut?
Ne e kuptojmë se ai është i trembur, dhe kjo na mjafton. Por çfarë mund të ndodhe në Shqipëri me frikën e tij? Në Shqipëri asgjë nuk mund të ndodhë, por kjo nuk ka rëndësi, sepse për frikën e një pushtetari, historia na ka thënë se ajo nuk mund të largohet, nëse ai nuk është një pushtetar i një vendi demokratik. Atëherë? Asgjë. Por shqiptarët janë në protestë. Nesër është një ditë e re dhe shqiptarët po presin të shohin frikën e qeverisë Rama; kurse historianët aktuale po presin dorëheqjen e kryeministrit Edi Rama. Të shohim, se shenjat janë që nesër në Tirane do të fillojë koha e pulsazioneve të forta demokratike. Te shohim, se e nesërmja pritet të jetë një ditë historike. Të shohim. Të shohim, por, gjithsesi, Edi Rama sot na u duk i trembur. Po nesër?!”, u shpreh Ngjela.
Kryeministër i ri nga protestat?
Ndërkohë, në një reagim tjetër, Ngjela komentoi edhe zërat që kanë qarkulluar së fundmi nga protesta për emrin e një kryeministri të ri, duke theksuar se një skenar i tillë nuk mund të realizohet jashtë procedurave kushtetuese. Sipas tij, kryeministri emërohet vetëm nga shumica parlamentare që del nga zgjedhjet dhe jo nga propozime apo iniciativa që burojnë nga protesta apo grupe qytetarësh. “Lexova se, në lidhje me krizën e Zvërnecit, thuhet që populli paska propozuar emrin e një kryeministri të ri. Por, kjo është një dëshirë antikushtetuese që nuk mund të realizohet. Të nderuar qytetarë! Në bazë të Kushtetutës së Shqipërisë, kryeministri del me anë të votimit të përgjithshëm, dhe e emron shumica e asaj partie që ndodhet aktualisht në Kuvendin e Shqipërisë.
Të gjitha të tjerat janë pasion i fantazisë joligjore, dhe nuk kanë asnjë vlerë kushtetuese. Shumica parlamentare në Kuvendin e Shqipërisë e ka zgjedhur kryeministrin e Shqipërisë në bazë të zgjedhjeve të përgjithshme të vitit 2025. Dhe sot, shumica parlamentare e Partisë Socialiste është po ajo që ka dalë nga zgjedhjet e përgjithshme të vitit 2025. Të gjitha arsyet e tjera janë jokushtetuese. Ata që po duan një kryeministër të ri duhet që, domosdoshmërisht të kenë sot shumicën e tyre në Kuvendin e Shqipërisë. Çdo lëvizje force që mund të dalë nga një protestë popullore në kryeqytet, dhe emëron një kryeministër të protestuesve, është e kundraligjshme dhe quhet grusht shteti. Kjo ndodh kështu sepse nuk e pranon Kushtetuta e Republikës së Shqipërisë, në qoftë se Kuvendi i Shqipërisë nuk e ka zgjedhur si një kryeministër të votuar nga shumica parlamentare që është aktualisht në Kuvendin e Shqipërisë”, u shpreh Ngjela.Spartak Ngjela paralajmëron shkundjen e madhe të pushtetit, si po nis në Tiranë faza e tronditjeve të forta
Comments are closed.