Një tragjedi e rëndë ajrore ka goditur Francën këtë të dielë, ku të paktën 11 persona kanë humbur jetën pas rrëzimit të një aeroplani civil në qytetin Tombaline, në verilindje të vendit.
Aeroplani, i cili i përkiste një shkolle parashutizmi, ishte nisur nga aeroporti Nancy-Essey për një fluturim rutinë stërvitor, por vetëm pak minuta pas ngritjes humbi kontrollin dhe u rrëzua, duke mos u lënë asnjë mundësi shpëtimi personave që ndodheshin në bord.
Sipas informacioneve paraprake të autoriteteve lokale, mes viktimave janë piloti, pesë studentë të shkollës së parashutizmit dhe pesë instruktorë me përvojë. Ende nuk dihen shkaqet që çuan në rrëzimin e avionit, ndërsa ekspertët e aviacionit kanë nisur hetimet për të përcaktuar nëse aksidenti u shkaktua nga një defekt teknik, gabim njerëzor apo faktorë të tjerë.
Menjëherë pas ngjarjes, në vendin e aksidentit mbërritën forca të shumta policie, zjarrfikës dhe ekipe të emergjencës, të cilat rrethuan zonën dhe nisën operacionet për sigurimin e saj. Autoritetet u kanë bërë thirrje qytetarëve të shmangin lëvizjet pranë vendit të ngjarjes për të mos penguar punën e ekipeve hetimore.
Ndërkohë, Ministri i Brendshëm i Francës është nisur drejt Tombaline për të ndjekur nga afër situatën dhe për t’u koordinuar me autoritetet lokale gjatë hetimeve mbi këtë aksident tragjik.
