Ka ndërruar jetë në moshën 64-vjeçare ish-kreu i Gjykatës së Vlorës, Skënder Haluci, i cili u shkarkua nga Vetingu, duke u përjashtuar nga radhët e sistemit të drejtësisë disa vite më parë.
Mësohet se Haluci ka qenë me familjen e tij në bjeshkët e Tropojës, në momentin kur ka ndërruar jetë, si pasojë e një komplikacioni me zemrën. Shekulli mëson se ka qenë vëllai që e ka gjetur të pajetë ish-kryegjyqtarin e Vlorës.
Skënder Haluci u shkarkua nga sistemi i drejtësisë në vitin 2020, ndërsa e konsideronte asokohe vendimin, si një dënim me vdekje që atij i ishte dhënë për herë të dytë. I ndjeri u akuzua në vitin 1983 se donte t’i bënte atentat Ramiz Alisë në Tropojë.
Ai u arrestua gjashtë muaj pas vizitës së Ramiz Alisë në Tropojë. Më pas u dënua me vdekje. Por, një muaj pas dënimit, Presidiumi i Kuvendit Popullor, ka kthyer dënimin nga me vdekje në heqje lirie me 25 vjet burg.
Sipas organeve të Vetingut, gjyqtari nuk justifikonte pasurinë, dhe shkollimin e vajzë, dhe për këtë shkak u largua nga detyra disa vite më parë.
