Gjykata e Lartë ka vendosur të rrëzojë kërkesën e biznesmenit Valon Ademi dhe kompanive të lidhura me të për administrimin e Aeroportit të Vlorës, duke i hapur rrugë rikthimit në projekt të kompanisë së biznesmenit Behgjet Pacolli.
Vendimi u mor këtë të hënë, ku trupa gjykuese ndryshoi vendimet e mëparshme të Gjykatës së Shkallës së Parë dhe të Gjykatës së Apelit në Tiranë, duke rrëzuar masën e sigurimit të padisë të kërkuar nga shoqëritë “Vlora International Airport” dhe “ZA Group”.
Më herët, Gjykata e Apelit kishte lënë në fuqi vendimin që i njihte Valon Ademit të drejtën për administrimin e aeroportit, ndërsa kompania e Behgjet Pacollit ishte përjashtuar nga procesi i vendimmarrjes.
Përplasja ligjore mes palëve është shoqëruar edhe me tensione në kantierin e punimeve të Aeroportit të Vlorës. Ditët e fundit janë raportuar incidente dhe përplasje mes punonjësve të kompanisë së Pacollit dhe përfaqësuesve të kompanisë së Ademit.
Në vendimin e saj, Gjykata e Lartë shprehet për:
“Ndryshimin e vendimit nr. 17959 Akti, datë 23.12.2025 të Gjykatës së Shkallës së Parë të Juridiksionit të Përgjithshëm Tiranë dhe vendimit nr. 185 (30-2026-1569), datë 19.02.2026 të Gjykatës së Apelit të Juridiksionit të Përgjithshëm Tiranë, si dhe rrëzimin e kërkesës së paditësve ‘Vlora International Airport’ SHPK dhe ‘ZA Group’ për marrjen e masës së sigurimit të padisë.”
Vendimi i fundit i Gjykatës së Lartë pritet të ndikojë drejtpërdrejt në vijimin e punimeve dhe administrimin e projektit të Aeroportit të Vlorës, një nga investimet strategjike më të rëndësishme infrastrukturore në jug të vendit.
Comments are closed.