Një aksident tragjik ka tronditur komunitetin shqiptar në Greqi, ku tre shqiptarë kanë humbur jetën dhe dy të tjerë kanë mbetur të plagosur rëndë.
Sipas të dhënave të para, viktimat janë shqiptarë nga Fieri. Ndërkohë, familjarët e tyre janë përballur me lajmin e rëndë, ndërsa dy të rinjtë e plagosur vijojnë të marrin trajtim në spital.
Sipas autoriteteve greke, viktimat janë një 23-vjeçar, një 26-vjeçar dhe një person tjetër, identiteti i të cilit nuk ishte bërë ende publik.Dy të mbijetuarit, të dy 18-vjeçarë, u dërguan në spital. Njëri ndodhet në gjendje kritike dhe është i intubuar, ndërsa tjetri ka pësuar dëmtime të shumta dhe vijon të marrë trajtim mjekësor.
Aksidenti ndodhi rreth orës 02:00 të mëngjesit të së enjtes në bulevardin Poseidonos, në kryqëzimin me rrugën Kalypsous, në Glyfada të Athinës. Automjeti, me pesë persona në bord, ka dalë nga rruga dhe është përplasur me forcë me një mur betoni pranë një hoteli.
Përplasja ka qenë aq e fortë sa automjeti është shkatërruar pothuajse plotësisht. Në vendngjarje mbërritën forcat zjarrfikëse, ndërsa tetë efektivë me tre automjete dhe pajisje speciale u angazhuan për nxjerrjen e personave të bllokuar në automjet.
Policia rrugore greke ka nisur hetimet për zbardhjen e rrethanave të aksidentit. Autoritetet po analizojnë edhe pamjet e kamerave të sigurisë në zonë, ndërsa deri tani nuk raportohet për përfshirjen e një automjeti tjetër.
Comments are closed.