Një sulm me armë zjarri në një shkollë të mesme në Graz, në juglindje të Austrisë, ka shkaktuar vdekjen e të paktën tetë personave, përfshirë nxënës dhe mësues.
Ndër viktimat ndodhet edhe një 13-vjeçare shqiptare e Kosovës, siç raportojnë mediat.
Ngjarja ndodhi rreth orës 10:00 të mëngjesit, kur një ish-nxënës i shkollës Dreierschützengasse qëlloi me armë brenda ambienteve të institucionit arsimor.
Autoritetet austriake konfirmuan numrin e viktimave, ndërkohë që mbi 30 persona të tjerë mbetën të plagosur gjatë sulmit.
Policia ndërmori një operacion të shpejtë në vendngjarje dhe më pas njoftoi se i dyshuari për sulmin kishte vrarë veten. Lajmi u konfirmua nga zyrtarët lokalë, përfshirë edhe kryetaren e bashkisë së Grazit, Elke Kahr.
Kancelari austriak Christian Stocker anuloi të gjitha takimet e parashikuara ditën e ngjarjes për shkak të situatës së rëndë në qytet.
Në një deklaratë për media, ai theksoi rëndësinë e përqendrimit në hetimet dhe ndihmën për familjet e viktimave.
Presidentja e Kosovës, Vjosa Osmani, reagoi lidhur me ngjarjen, duke e cilësuar si “tmerr” dhe duke theksuar se shkollat nuk duhet të jenë vende dhune.
Ajo u shpreh ngushëllime familjeve të viktimave dhe mbështetje për popullin austriak në këtë moment të vështirë.
Policia vijon hetimet për zbardhjen e plotë të rrethanave të sulmit, ndërsa autoritetet shëndetësore po kujdesen për të plagosurit në spitale.