Agjencia për Media dhe Informim ka reaguar pas lajmeve që po qarkullojnë në rrjetet sociale për gjendjen shëndetësore të studentëve të lënduar gjatë protestës në Tiranë.
Përmes një njoftimi, MIA i ka cilësuar të pavërteta pretendimet se dy prej studentëve ndodhen në intubim, duke u bërë thirrje qytetarëve të tregojnë kujdes me informacionet që shpërndajnë dhe të mos përhapin të dhëna që nuk janë konfirmuar zyrtarisht.
Agjencia thekson se informacionet e sakta mbi gjendjen shëndetësore të personave të lënduar duhet të merren nga Ministria e Shëndetësisë dhe Mirëqenies Sociale.
“Informacioni që po qarkullon në disa faqe në Instagram dhe platforma të tjera, sipas të cilit dy studentë ndodhen në intubim, është i pavërtetë!
Mos bini pre e dezinformimit!
U bëjmë thirrje qytetarëve të mos besojnë dhe të mos shpërndajnë informacione të pavërtetuara, të cilat krijojnë panik dhe shqetësim të panevojshëm te publiku dhe familjarët.
Agjencia për Media dhe Informim u bën thirrje qytetarëve të informohen vetëm përmes burimeve zyrtare dhe të besueshme, duke shmangur burimet që përhapin informacione të rreme apo çorientuese.
Informacioni zyrtar mbi gjendjen shëndetësore të personave të lënduar gjatë protestës, qofshin protestues apo punonjës të Policisë së Shtetit, përcillet nga institucioni kompetent, Ministria e Shëndetësisë dhe Mirëqënies Sociale”, njofton MIA.
Comments are closed.