Deputetja e pavarur e Kuvendit të Shqipërisë, Marjana Koçeku, u ka drejtuar një letër zyrtare përfaqësive diplomatike dhe institucioneve kryesore ndërkombëtare të akredituara në vend, ku ngre shqetësime serioze lidhur me përdorimin e forcës nga Policia e Shtetit ndaj protestuesve dhe të miturve.
Dokumenti u është dërguar Delegacionit të Bashkimit Evropian, Ambasadës së SHBA-së, Prezencës së OSBE-së, Zyrës së Këshillit të Evropës, Koordinatorit të OKB-së, si dhe kryetarëve të misioneve diplomatike në Tiranë.
Në letrën e saj, Koçeku denoncon përdorimin e tepruar të forcës, goditjen e protestuesve të shtrirë në tokë, si dhe keqtrajtimet e raportuara gjatë shoqërimeve dhe ndalimeve në komisariate.
Në mënyrë të veçantë, deputetja kërkon zbardhjen e veprimeve të personave me veshje civile pa shenja identifikimi policor, të cilët kanë marrë dhe larguar me forcë protestues nga tubimet:
Identifikimi i civilëve: Kërkohet bërja publike e identitetit të personave me veshje civile, kompetencat e tyre ligjore dhe zinxhiri komandues që ka autorizuar këto ndërhyrje.
Përgjegjësia menaxhuese: Hetimet duhet të shtrihen përtej efektivëve individualë, duke përfshirë drejtuesit që kanë planifikuar dhe mbikëqyrur operacionet policore.
Përmes gjashtë kërkesave drejtuar trupit diplomatik, Koçeku kërkon dënimin publik të dhunës, hetim të pavarur e të menjëhershëm, mbrojtje të garantuar për të miturit e ndaluar, si dhe monitorim të drejtpërdrejtë ndërkombëtar mbi respektimin e të drejtave të njeriut dhe standardeve demokratike në vend.
