Deputetja Marjana Koçeku ka reaguar pas tensioneve dhe përplasjeve gjatë protestës së studentëve në Tiranë, duke i bërë thirrje ministrit të Brendshëm, Ervin Demo, të ndalojë dhunën dhe të garantojë mbrojtjen e protestuesve.
Deputetja Marjana Koçeku ka reaguar pas përplasjeve të regjistruara këtë të martë para Ministrisë së Arsimit, ku protesta e studentëve u shoqërua me tensione dhe ndërhyrjen e policisë.
Përmes një reagimi publik, Koçeku i është drejtuar ministrit të Brendshëm, Ervin Demo, duke kërkuar ndalimin e dhunës ndaj studentëve dhe trajtimin e problematikave që, sipas saj, i kanë nxjerrë të rinjtë në rrugë.
“Ervin Demo, dhuna kundër studentëve nuk duhet të jetë suksesi yt i parë pas ardhjes në detyrë si ministër i Brendshëm. Ndalo dhunën, mbro studentët dhe lufto padrejtësitë që i kanë çuar ata studentë në shesh”, shkruan Koçeku.
Më tej, deputetja e ka kritikuar mënyrën e menaxhimit të protestës, duke akuzuar autoritetet për përdorimin e forcës ndaj protestuesve.
“Ngjarja e sotme të tregoi frikacak e të padrejtë. Po mbroheni me dhunë kundër njerëzve që nuk i shmangni dot. Hiqni duart prej studentëve!”, përfundon reagimin e saj Koçeku.
Protesta para Ministrisë së Arsimit është shoqëruar me përplasje mes studentëve dhe policisë, ndërsa janë raportuar edhe persona të lënduar. Të rinjtë kanë ngritur shqetësime për kushtet në arsim dhe kanë kërkuar ndryshime, duke shoqëruar tubimin me thirrje kundër qeverisë.
Comments are closed.