Nga 1 korriku 2027, në Shqipëri parashikohet të nisë zbatimi i skemës së re të bonusit të bebeve, e cila do të sigurojë pagesa mujore për fëmijët gjatë pesë viteve të para të jetës.
Mbështetja financiare do të variojë nga 5 mijë deri në 10 mijë lekë në muaj, në varësi të radhës së lindjes së fëmijës në familje.
Detajet e bëra publike nga qeveria dhe dokumentet e projektbuxhetit 2027 tregojnë se skema e re do të funksionojë si mbështetje e vazhdueshme, krahas bonusit të menjëhershëm që jepet aktualisht pas lindjes.
Për fëmijën e parë parashikohet një pagesë prej 5 mijë lekësh në muaj, ose 60 mijë lekë në vit. Nëse përfitohet për të gjithë periudhën pesëvjeçare, shuma e përgjithshme arrin në 300 mijë lekë.
Për fëmijën e dytë, pagesa do të jetë 7 mijë lekë në muaj, ose 84 mijë lekë në vit. Në përfundim të pesë viteve, familja mund të përfitojë gjithsej 420 mijë lekë.
Ndërsa për fëmijën e tretë mbështetja do të arrijë në 10 mijë lekë në muaj, ose 120 mijë lekë në vit, duke e çuar përfitimin e përgjithshëm në 600 mijë lekë gjatë pesë viteve.
Kush do ta përfitojë bonusin e ri?
Një element i rëndësishëm i skemës lidhet me kriteret ekonomike të familjeve përfituese.
Megjithëse kryeministri Edi Rama e ka prezantuar politikën si mbështetje për çdo fëmijë të lindur, Ministria e Shëndetësisë dhe Mirëqenies Sociale ka sqaruar në dokumentet zyrtare se pagesat mujore synojnë familjet me të ardhura të ulëta.
Gjatë diskutimeve për projektbuxhetin 2027 në Komisionin e Ekonomisë, ministrja Klodiana Spahiu ka përmendur si objektiv përfshirjen e familjeve me të ardhura mujore deri në 180 mijë lekë.
Megjithatë, ky kufi është ende një kriter i propozuar dhe jo një prag përfundimtar i përcaktuar me akt ligjor. Ministria ka lënë të hapur mundësinë e rishikimit të skemës dhe zgjerimit të përfituesve.
A do të vazhdojë bonusi që merret në maternitet?
Sipas sqarimeve të dhëna gjatë diskutimeve parlamentare, bonusi ekzistues i lindjes parashikohet të vazhdojë edhe pas hyrjes në fuqi të skemës së re.
Aktualisht, familjet që plotësojnë kushtet ligjore përfitojnë një pagesë të menjëhershme prej 40 mijë lekësh për fëmijën e parë, 80 mijë lekësh për të dytin dhe 120 mijë lekësh për të tretin.
Skema e re synon të shtojë mbështetjen mujore për familjet që do të plotësojnë kriteret përkatëse, pa hequr automatikisht bonusin e lindjes që jepet sot.
Përfitimi i menjëhershëm është i kushtëzuar edhe nga kriteri i qëndrimit në Shqipëri. Prej nëntorit 2023, legjislacioni e ka kufizuar bonusin për shtetasit shqiptarë që jetojnë në territorin e vendit për më shumë se 180 ditë.
Po fëmijët që kanë lindur përpara korrikut 2027?
Kjo është një nga çështjet që mbetet për t’u sqaruar me miratimin e rregullave përfundimtare.
Dokumentet e projektbuxhetit i referohen mbështetjes për fëmijët nga lindja deri në moshën pesëvjeçare, por ende nuk është përcaktuar qartë nëse do të përfshihen edhe fëmijët e lindur përpara datës 1 korrik 2027.
Po ashtu, mbeten për t’u përcaktuar procedurat e aplikimit, dokumentacioni i nevojshëm, mënyra e verifikimit të të ardhurave dhe institucioni që do të kryejë shpërndarjen e pagesave.
Sa para janë parashikuar në buxhet?
Për vitin 2027, Ministria e Shëndetësisë ka parashikuar 2.8 miliardë lekë për programin e bonusit të bebes.
Sipas prezantimit zyrtar të projektbuxhetit, për politikën e re të mbështetjes mujore parashikohet një rritje financimi prej 500 milionë lekësh gjatë vitit 2027, ndërsa në vitet pasardhëse financimi shtesë pritet të arrijë në 1.1 miliardë lekë.
Qeveria synon që, përmes kësaj politike, të ndihmojë familjet të përballojnë kostot e rritjes së fëmijëve dhe të nxisë lindshmërinë.
Megjithatë, skema është ende në fazën e projektimit dhe miratimit. Përpara nisjes së planifikuar më 1 korrik 2027, pritet të përcaktohen kriteret përfundimtare të përfitimit dhe mënyra konkrete e shpërndarjes së parave. /skyweb.al
Pagesë çdo muaj për 5 vjet! Si do të shpërndahet Bonusi i Bebeve dhe sa është përfitimi
