Autoritete detare kanë lëshuar një njoftim zyrtar për përkeqësimin e situatës hidrometeorologjike brenda dhe jashtë Gjirit të Vlorës gjatë periudhës 11-14 nëntor 2026.
Sipas parashikimeve, duke filluar nga ora 16:00 e ditës së sotme pritet erë me drejtim jug-juglindje me forcë deri në 7-8 shkallë Bft, shpejtësi 20–35 m/s dhe lartësi dallgësh që do të luhatet nga 2.00 deri në 4.50 metra. Për këtë arsye, është pezulluar dhënia e lejeve të nisjes për mjetet e vogla lundruese dhe ato të peshkimit që operojnë në det të hapur jashtë gjirit, vendim i cili mbetet në fuqi deri në orën 06:00 të datës 14 nëntor.
Institucionet dhe subjektet detare janë thirrur të marrin masa për sigurimin e mjeteve në port dhe rritjen e gatishmërisë së ekuipazheve për parandalimin e çdo situate emergjente. Ndërkohë, anijet e transportit ndërkombëtar detar do të vijojnë operacionet normalisht sipas linjave përkatëse. Përmirësimi i kushteve të motit për mjetet e vogla parashikohet pas mëngjesit të së shtunës.
