Sali Berisha ka deklaruar se është i gatshëm të bashkëpunojë politikisht me çdo forcë apo individ që ka si objektiv largimin e kryeministrit Edi Rama nga pushteti, edhe nëse këta aktorë kanë qëndrime kritike ndaj tij personalisht.
Gjatë një bashkëbisedimi online me qytetarët, Berisha u pyet edhe për mundësinë e një bashkëpunimi me kryebashkiakun e Tiranës, Erion Veliaj. Kreu i PD-së theksoi se një bashkëpunim i tillë nuk do të ishte mbi bazën e një programi të përbashkët politik, por rreth një objektivi të vetëm: largimit të Ramës nga pushteti.
Berisha e cilësoi Veliajn si “një të burgosur hajdut”, por shtoi se nuk do të pengonte asnjë individ që dëshiron të kontribuojë në këtë objektiv, edhe nëse vijon ta kritikojë atë.
“Në këtë listë hyjnë të gjithë ata, të cilët e konsiderojnë të keqen më të madhe për Shqipërinë, Edi Ramën. Erion Veliaj është një i burgosur hajdut aty ku është, dhe në arrestimin dhe krimet e tij, Partia Demokratike ka një kontribut të pamohueshëm.
Por, edhe njëherë e them, cilido që dëshiron të kontribuojë në largimin e të keqes më të madhe, nuk është bashkim programor ky, jo. Shqiptarët, ky regjim po i dëbon nga trojet e tyre, prandaj duhet të ikë një minutë e më parë. Po në qoftë se Veliaj jep kontribut, le të japë. Nuk ndaloj asnjërin. Absolutisht që nesër. Edhe të vazhdojë të kritikojë, pa diskutim. I dashur mik, më fal edhe një moment. Shqiptarët nuk e kanë kuptuar se kjo është diktatura më e keqe që mund të ekzistojë”, u shpreh Berisha.
