Një aksident i rëndë është regjistruar përgjatë autostradës Fier-Vlorë, ku një automjet është përplasur me një fadromë.
Si pasojë e përplasjes, ka humbur jetën shefi i Krimeve të Rënda të Vlorës, Ermal Lulaj, ndërsa një person tjetër ka mbetur i plagosur dhe është transportuar drejt Spitalit Rajonal të Vlorës.
Aksidenti ndodhi pasditen e sotme, në afërsi të Novoselës.
Ermal Lulaj, rreth të 40-ave, më herët ka shërbyer si shef i Antidrogës. Ai është baba i dy fëmijëve.
Sipas njoftimit të policisë, automjeti tip “Toyota”, me drejtues Ermal Lulajn, dyshohet se për shkak të kushteve të këqija atmosferike dhe humbjes së kontrollit mbi drejtimin e mjetit, është përplasur me një mjet të rëndë tip skrep, që drejtohej nga 63-vjeçari Thanas Poçaj.
Paraprakisht, dyshohet se mjeti i rëndë ka qenë pa sinjalistikë në pjesën e pasme.
Si pasojë e përplasjes, Ermal Lulaj ka humbur jetën në vendngjarje, ndërsa 63-vjeçari Thanas Poçaj ka mbetur i plagosur dhe ndodhet nën kujdesin e mjekëve.
Policia e Shtetit ka dalë me një njoftim zyrtar lidhur me detajet e aksidentit fatal të ndodhur mbrëmjen e kësaj të hëne në autostradën Fier-Vlorë, ku për pasojë ka humbur jetën efektivi i lartë i Policisë së Vlorës, Ermal Lula.
Sipas njoftimit të policisë, efektivi Lula ka humbur kontrollin e automjetit të tij për shkak të motit të keq dhe është përplasur me një mjet tip skrep, me drejtues shtetasin Th. P., 63 vjeç, i cili ka mbetur i plagosur dhe ndodhet në spital.
Njoftimi i plotë i Policisë:
Rreth orës 18:00, në autostradën “100 Vjetori”, në drejtimin Fier–Vlorë, automjeti tip “Toyota”, me drejtues shtetasin E. L., dyshohet se, për shkak të motit të keq dhe humbjes së kontrollit mbi drejtimin e automjetit, është përplasur me një mjet tip skrep, me drejtues shtetasin Th. P., 63 vjeç.
Si pasojë e përplasjes, ka humbur jetën në vendngjarje drejtuesi i automjetit “Toyota”, shtetasi E. L., oficer policie në DVP Vlorë.
Ndërsa shtetasi Th. P. është transportuar në spital për ndihmë mjekësore.
Grupi hetimor ndodhet në vendngjarje dhe, nën drejtimin e Prokurorisë, po vijon punën për sqarimin e rrethanave dhe përcaktimin e shkakut të saktë të aksidentit.