Kryeministri Edi Rama ka kaluar në një sulm të drejtpërdrejtë ndaj Erion Veliajt, duke ironizuar mesazhet që kryebashkiaku përcjell nga qelia dhe duke i cilësuar si dorëshkrime nga një “burg imagjinar politik”.
Në një tjetër deklaratë që thellon përplasjen brenda Partisë Socialiste, Rama ka marrë në mbrojtje drejtuesit dhe punonjësit e Bashkisë së Tiranës, duke hedhur poshtë pretendimet për largime nga puna për shkak se nuk mbështesin publikisht Veliajn në rrjetet sociale.
Kryeministri ka vënë në shënjestër edhe avokatin e Veliajt, të cilin e akuzon se i drejtohet zyrtarisht Bashkisë së Tiranës duke firmosur si drejtues politik, ndërkohë që sipas Ramës është një nga dy personat e përjashtuar së fundmi nga strukturat e PS-së.
“Prej vitesh s’u kërkon askush llogari për kë votojnë, jo më t’i largojnë nga puna pse nuk paraqiten me uniformën e partisë. Si mund të largohet një grua që e ka mbajtur me dinjitet uniformën e kryepolicit bashkiak të kryeqytetit, ashtu si të tjerë drejtues dhe punonjës, pse nuk u bëjnë ‘like’ e ‘share’ dorëshkrimeve të Lali-t nga burgu imagjinar politik, apo pse nuk gëzojnë mbështetjen e avokatit të tij?
Ky i fundit i adresohet shkresërisht Bashkisë së Tiranës duke firmosur si drejtues politik, ndërkohë që është një nga dy të përjashtuarit e ditëve të fundit nga kjo shtëpi, ku s’do të tolerohet më askush që sillet me popullin si e ëma e Zeqos në majë të thanës”, deklaroi Rama.
Rama nga Asambleja e Partisë Socialiste në Tiranë tha gjithashtu se kryebashkiaku dueht të kuptojë se po gabon në raport me të dhe me PS-në.
“Unë nuk e gjykoj dot Erionin për çfarë ai thotë dhe çfarë ai bën. Po vetëm uroj me gjithë zemër që ai të kuptojë se është në gabim”, tha Rama, duke shtuar se e kishte fjalën për raportin e Veliajt me të dhe me Partinë Socialiste.
Rama paralajmëroi se PS do ta gjykojë “me ashpërsinë më të madhe politike” këdo që, sipas tij, vepron kundër punonjësve të Bashkisë së Tiranës. Ai përmendi punonjësit socialistë, ata pa përkatësi partiake, si Elona Lalaj, dhe demokratët që punojnë në bashki.
Kryeministri e cilësoi mungesën e kryebashkiakut si një problem që prek ecurinë e punëve të qeverisjes vendore. Ai tha se zgjidhjen e sheh më 9 maj, në Ditën e Evropës, kur shprehu bindjen se socialistët do ta fitojnë sërish Tiranën.
Duke folur për bilancin e 13 viteve të qeverisjes, Rama përmendi dobësitë dhe gabimet e PS-së, por tha se forcat e tjera politike, sipas tij, rrezikojnë të sjellin kaos, konfuzion dhe paqëndrueshmëri.
“Unë nuk e gjykoj dot Erionin për çfarë ai thotë dhe çfarë ai bën. Po vetëm uroj me gjithë zemër që ai të kuptojë se është në gabim. Ditë e natë në raport me mua dhe në raport me Partinë Socialiste të Shqipërisë, por ne do ta gjykojmë me ashpërsinë më të madhe politike këdo që Bashkinë e Tiranës do ta zbatojë këtë kulturë si e qorrë kundër njerëzve të bashkisë, qofshin anëtarë të kësaj familje, qofshin shërbyes publik pa parti si Elona Lalaj, apo qofshin edhe qytetarë demokratë që punojnë në radhët e mira e mira njerëzve në Bashkinë e Tiranës.
E dimë të gjithë që mungesa e kryebashkiakut është një problem shumëplanëshe për ecurinë e punëve të qeverisë vendore, të cilin ne do ta zgjidhim vetëm më nëntë maj me fitoren e Tiranës në Ditën e madhe të Evropës. Dhe ne do ta fitojmë përsëri Tiranën, sepse pavarësisht dhe përtej të metave, dobësive, gabimeve apo edhe fajeve tona, në gjatësinë e një përpjekjeje të vështirë sa 30 vjet përpjekje të mundimshme.
Partia Socialiste nuk mbetet thjesht alternativa më e mirë relative në një hapësirë politike ku alternativat e tjera janë jo vetëm shumë më të dobëta, po janë seriozisht të rrezikshme për të nesërmen e vendit, pasi pas çdo njërit prej tyre vjen kaosi, vjen konfuzioni, vjen paqëndrueshmëria që e kërcënon, e kërcënon sot Shqipërinë si një hije që tani më është e dukshme”, tha Rama.
Me këtë deklaratë, kryeministri nuk është mjaftuar më me mesazhe të përgjithshme për disiplinën brenda PS-së, por ka goditur drejtpërdrejt Veliajn, duke vënë në lojë pretendimet e tij për përndjekje politike dhe duke e paraqitur aktivitetin e tij nga burgu si një përpjekje për të ruajtur ndikimin mbi Bashkinë e Tiranës.
Përplasja mes dy figurave të rëndësishme socialiste po merr kështu një tjetër dimension, ndërsa Rama po e bën gjithnjë e më të qartë se nuk pranon ndërhyrje dhe ndikim paralel në drejtimin politik të Tiranës.