Ish-kreu i Policisë italiane, Gianni De Gennaro, i ka dhënë fund jetës duke u vetëvrarë me armë zjarri. Sipas asaj që mësohet nga burime zyrtare, 78-vjeçari është vetëvrarë në shtëpinë e tij të pushimit në Toskanë.
Mësohet se De Gennaro ishte tronditur rëndë nga hetimi i Prokurorisë së Caltanissetta-s lidhur me masakrën e “Via D’Amelio” (ku u vra gjyqtari Paolo Borsellino), çështje në të cilën ai ishte nën hetim për devijim të hetimeve. Më 1 dhjetor, Gjykata e Apelit pritej të shprehej mbi kërkesën për arrestimin e tij, e cila fillimisht ishte refuzuar nga gjyqtari i hetimeve paraprake.
Si u zbulua ngjarja
Hetuesit po punojnë për rindërtimin e plotë të dinamikës së ngjarjes. Sipas të dhënave të para, De Gennaro ndodhej i vetëm në banesë. Alarmi u ngrit nga familjarët e tij, të shqetësuar pasi nuk kishin asnjë lajm prej tij që prej mbrëmjes së të premtes, 20 nëntor. Rreth orës 09:00 të mëngjesit, punonjësit e mirëmbajtjes së vilës kanë lajmëruar karabinierët.
Më pas, në orën 09:38, vetë efektivët e policisë kanë njoftuar urgjencën mjekësore (118) për të konstatuar vdekjen. De Gennaro kishte ndërruar jetë menjëherë. Në vendngjarje mbërritën mjeku ligjor i caktuar nga Prokuroria e Grosseto-s, prokurori i çështjes, si dhe ekspertët e policisë shkencore (RIS) për të kryer këqyrjen e banesës.
Hetimet për “axhendën e kuqe” dhe kontrollet e ditëve të fundit
De Gennaro ishte nën hetim nga Prokuroria e Caltanissetta-s për devijim të hetimeve në kuadër të dosjes për masakrën e “Via D’Amelio” dhe zhdukjen e “axhendës së kuqe” të gjyqtarit të ndjerë Paolo Borsellino. Ditët e fundit, magjistratët i kishin komunikuar zyrtarisht marrjen si të pandehur dhe kishin urdhëruar kontrolle në disa ambiente në pronësi të tij.
Konkretisht, njësia speciale e karabinierëve (ROS) kishte ekzekutuar gjashtë urdhër-kontrolle në provincën e Romës. Përveç De Gennaro-s, nën hetim dhe kontroll ishin vënë edhe bashkëpunëtori i drejtësisë Salvatore Contorno, zyrtarja e shërbimeve inteligjente (DIS) Donatella Peruzzi, truproja Massimo Carnicelli dhe ish-inspektori i policisë Francesco Pacetto.
Sipas hipotezës së prokurorisë, De Gennaro, me ndihmën e bashkëpunëtorëve të tij, kishte vepruar për të penguar të penduarin e drejtësisë Contorno që të jepte deklarata para prokurorëve, si dhe kishte fshehur dokumente të rëndësishme që lidheshin me arrestimin e tij në vitin 1989 në Siçili. Hetimi synonte të zbulonte përgjegjësitë e zyrtarëve të lartë të shtetit në devijimin e hetimeve për vrasjen e Borsellino-s.
Reagimi i avokatit: “Pasojë e akuzave shpifëse”
I tronditur nga lajmi, avokati i tij, Francesco Bertorotta, i cili e mbronte së bashku me profesorin e njohur Franco Coppi, fajësoi presionin publik dhe akuzat ndaj klientit të tij: “Jam i shokuar, i shkatërruar. Këto janë pasojat e akuzave shpifëse që hidhen si ushqim për opinionin publik. E njihja Gianni De Gennaro-n prej 15 vitesh; para marrëdhënies profesionale kishim një miqësi të fortë.”
Ndërkohë, vëllai i gjyqtarit të vrarë, Salvatore Borsellino, reagoi ashpër ndaj prokurorëve duke i cilësuar ata si “përgjegjës për shtytje drejt vetëvrasjes”, ndërsa kryeministrja Giorgia Meloni u shpreh “thellësisht e tronditur nga kjo ndarje tragjike nga jeta”.
Kush ishte Gianni De Gennaro
I lindur në Reggio Calabria, Gianni De Gennaro u nda nga jeta në moshën 78-vjeçare. Pas diplomimit për drejtësi në Universitetin “La Sapienza”, ai iu bashkua Policisë së Shtetit në vitin 1973.
Për 11 vite punoi krah për krah me gjyqtarin legjendar Giovanni Falcone në hetimet kundër mafias. Ai drejtoi Drejtorinë e Hetimit Antimafia (DIA) dhe në vitin 2000 u emërua kreu i Policisë italiane, post të cilin e mbajti për shtatë vjet. Më pas drejtoi Shërbimin Informativ (DIS), mbajti poste të larta institucionale dhe ishte president i gjigantit të mbrojtjes “Leonardo”, i “Banca Popolare di Bari”, si dhe i shoqërisë “Eurolink”, e angazhuar në projektin e ndërtimit të urës mbi ngushticën e Mesinës.
Top Channel