Një ngjarje tragjike ka ndodhur në Lancashire të Anglisë, ku një djalë katërvjeçar ka humbur jetën pasi një gur varri është rrëzuar mbi të. Incidenti ndodhi rreth orës 13:00 të ditës së djeshme.
Pavarësisht përpjekjeve të menjëhershme të shërbimeve emergjente për ta shpëtuar, fëmija nuk mundi të mbijetojë.
Policia e Lancashire konfirmoi ngjarjen me një deklaratë: “U thirrëm në Rawtenstall Cemetery më 5 korrik rreth orës 13:00, pas raportimeve se një gur varri kishte rënë mbi një fëmijë.
Fatkeqësisht, dhe pavarësisht përpjekjeve të shërbimeve emergjente, djali ndërroi jetë. Mendimet tona janë me të afërmit e tij në këtë moment të dhimbshëm.”
Edhe Këshilli Bashkiak i Rossendale shprehu ngushëllimet e tij: “Jemi thellësisht të tronditur nga vdekja tragjike e një fëmije të vogël sot në varrezat e Rawtenstall.
Mendimet tona janë me familjen e tij në këtë kohë të vështirë. Jemi duke bashkëpunuar me të gjitha institucionet për të kuptuar rrethanat e këtij incidenti.”
Ngjarja ka prekur gjithë komunitetin lokal. Këshilltarja e lagjes Longholme, Liz McInnes, e cilësoi rastin si një “tragjedi të tmerrshme”, ndërsa deputeti Andy MacNae shprehu solidaritetin me familjen dhe të gjithë të prekurit.
Rawtenstall Cemetery ndodhet në rrugën Burnley dhe shtrihet në një sipërfaqe prej rreth 17 hektarësh, ku mbahen më shumë se 21,000 varrime.
Ajo ofron shërbime funerale për komunitetet Katolike, të Kishës së Anglisë, jokonformiste dhe myslimane.