Revista amerikane “Forbes” i ka kushtuar vëmendje debatit mbi investimin e Jared Kushner, dhëndrit të presidentit të Shteteve të Bashkuara të Amerikës (SHBA), Donald Trump në Shqipëri, duke paralajmëruar se projekti mund të komplikojë përpjekjet e vendit për anëtarësim në Bashkimin Evropian (BE). Në artikullin e publikuar së fundmi, “Forbes” thekson se shqetësimet mjedisore lidhur me resortet e planifikuara në ishullin e Sazanit dhe në zonën bregdetare të Zvërnecit kanë tërhequr tashmë vëmendjen e Komisionit Evropian.
Sipas revistës, zyrtarët e Brukselit kanë konfirmuar se i kanë shprehur shqetësime qeverisë shqiptare për përputhshmërinë e projektit me standardet mjedisore që duhet të plotësojnë vendet kandidate për anëtarësim në BE. Zëdhënësi i Komisionit Evropian për Çështjet e Zgjerimit, Guillaume Mercier, deklaroi se Brukseli po monitoron nga afër zhvillimet në zonën e mbrojtur Pishë Poro-Nartë dhe ka ngritur shqetësime për mangësi të mundshme të projektit. “Shqipëria duhet të përmbahet nga veprime që mund të minojnë përmbushjen e standardeve përmbyllëse”, citohet të ketë thënë Mercier. Artikulli kujton se Komisioni Evropian ka ngritur më herët shqetësime edhe për ndryshimet ligjore të bëra në vitin 2024, të cilat lehtësuan zhvillimin e projekteve turistike në zona të mbrojtura.
“Forbes”: Shqipëria duhet të harmonizojë ligjet mjedisore me standardet e BE-së
“Forbes” thekson se Shqipëria duhet të harmonizojë plotësisht legjislacionin e saj me direktivat evropiane për mbrojtjen e shpendëve dhe habitateve natyrore, si pjesë e detyrimeve për mbylljen e Kapitullit 27 për Mjedisin dhe Ndryshimet Klimatike. Nga ana tjetër, kryeministri Edi Rama ka hedhur poshtë shqetësimet se projekti bie ndesh me standardet evropiane, duke deklaruar se zhvillimi do të respektojë të gjitha kërkesat mjedisore dhe se do t’i nënshtrohet një vlerësimi të plotë të ndikimit në mjedis. “Do të jetë një projekt i bukur dhe ne do ta realizojmë”, citohet Rama nga “Reuters”.
Artikulli vëren gjithashtu se projekti është ende në faza të hershme dhe mund të duhen deri në dhjetë vjet për përfundimin e tij. Ndërkohë, kundërshtimet ndaj investimit janë rritur javët e fundit, me protesta në Shqipëri dhe jashtë vendit, ndërsa Prokuroria e Posaçme (SPAK) po zhvillon një hetim lidhur me procedurat që kanë shoqëruar projektin. Sipas “Forbes”, Shqipëria synon të përfundojë negociatat e anëtarësimit deri në vitin 2027 dhe të bëhet pjesë e Bashkimit Evropian rreth vitit 2030, por çdo zhvillim që prek standardet mjedisore mund të vendoset nën vëzhgimin e institucioneve evropiane.
KE: Projekti në Zvërnec mund të ndikojë në rrugën e Shqipërisë drejt BE-së
Ndërkohë kujtojmë se disa ditë më parë Komisioni Evropian ka shprehur shqetësimin se projekti i planifikuar në zonën e mbrojtur Pishë Poro–Nartë mund të ketë ndikime mjedisore që bien në kundërshtim me procesin e negociatave të anëtarësimit mes Shqipërisë dhe Bashkimit Evropian. Ditët e fundit në Shqipëri janë mbajtur protesta kundër punimeve për ndërtimin e një resorti në Zvërnec, pranë Vlorës, mes shqetësimeve lidhur me ndikimin në mjedis dhe mosmarrëveshjeve mbi pronësinë e tokës. Zëdhënësi i Komisionit Evropian, Guillaume Mercier, ka tërhequr vëmendjen se, në procesin e anëtarësimit në BE, si pjesë e standardeve përmbyllëse për negociimin e Kapitullit 27 mbi mjedisin dhe ndryshimet klimatike, Shqipëria pritet të përshtatet plotësisht me legjislacionin e bllokut evropian në këtë fushë. Kjo, sipas tij, përfshin zbatimin e Direktivave për Shpendët dhe Habitatet, shfuqizimin e dispozitave të papajtueshme të miratuara përmes ndryshimeve në Ligjin për zonat e mbrojtura, si dhe shfuqizimin e legjislacionit të vitit 2015 për investimet strategjike. “Përveç kësaj, për të mbyllur Kapitullin 27, Shqipëria duhet të tregojë kapacitetin e saj për të menaxhuar vendet e ardhshme të Natura 2000 [v.j. rrjet për zonat e mbrojtura natyrore në BE], duke përfshirë masat e ruajtjes që parandalojnë përkeqësimin e habitateve dhe specieve. Shqipëria duhet të përmbahet nga veprimet që mund të dëmtojnë përmbushjen e standardeve të mbylljes”, thuhet në përgjigjen me shkrim të zëdhënësit Mercier për Radion Evropa e Lirë (REL).
Comments are closed.