Një aksident tragjik ndodhi të dielën në një autostradë në shtetin e Jaliscos, Meksikë, që rezultoi në humbjen e jetës së të paktën 10 personave dhe plagosjen e 10 të tjerëve.
Sipas raportimeve të mediave të huaja, aksidenti rrugor u shkaktua nga një kamion me rimorkio, i cili, sipas autoriteteve meksikane, dyshohet se kishte një defekt në frena. Ai nuk mundi të ngadalësonte dhe u përplas me automjete që ishin të palëvizshme për shkak të një aksidenti tjetër rrugor. Mësohet se shoferi i kamionit me rimorkio, i cili shkaktoi aksidentin, u mor në paraburgim nga Garda Kombëtare.
Sipas Ministrisë së Sigurisë dhe Mbrojtjes Civile të Nayarit, fillimisht ndodhi një aksident trafiku midis dy kamionëve me rimorkio. Ndërsa ekipet e emergjencës po i përgjigjen incidentit, një kamion i tretë me rimorkio u përplas me automjetet e palëvizshme në vendngjarje.
“Si rezultat i kësaj përplasjeje të dytë, tre automjete private dhe dy kamionë me rimorkio u shkatërruan plotësisht nga zjarri. Përveç kësaj, dy automjete të tjera private dhe një Dodge Charger i Gardës Kombëtare pësuan dëme materiale.”, theksuan autoritetet.
Aksidenti shkaktoi një zjarr në autostradë dhe në automjete, por zjarrfikësit arritën ta vinin nën kontroll pak më vonë. Siç thuhet në njoftimin e Mbrojtjes Civile, dy të mitur janë midis të vdekurve, ndërsa dy anëtarë të Gardës Kombëtare janë të shtruar në spital në gjendje të rëndë.
