Arjan Konomi ka reaguar ashpër ndaj Top Channel, pas transmetimit të premierës së emisionit të ri “Live me Luizin”, të drejtuar nga Luiz Ejlli.
Përmes një videoje të publikuar në Instagram, Konomi ka ngritur pikëpyetje mbi faktin nëse programi është transmetuar realisht drejtpërdrejt, siç sugjeron titulli i tij, apo ka qenë i regjistruar më herët.
“Një skandal! Një turp i madh dhe një mashtrim i madh për televizionin Top Channel. Dje, pas shumë publicitetesh për ‘Live me Luizin’… Shikoni pak këtu. Të gjithë shqiptarët kuptojnë se ky emision është live, por ndërkohë shikoni pak këtë tabelën, thotë ‘Emision i regjistruar’”, shprehet Konomi në video.
Ai ndalet më pas te një tjetër element që shfaqej gjatë transmetimit, ku programi identifikohej si “episod i regjistruar”.
“Jemi ‘Live me Luizin’, e ftuar Eli Fara, dhe shikoni këtu çfarë nxjerrin: ‘Episod i regjistruar’”, vijon Konomi, duke treguar pamjet e transmetimit në televizor.
Krahas videos, ai publikoi edhe një reagim të gjatë, ku kritikoi mënyrën se si programi i është prezantuar publikut.
“Ja si mashtrohet publiku i gjerë. Me titullin ‘LIVE’. Skandal për një televizion kombëtar me emisionin e ri ‘Live me Luizin’”, shkroi Konomi.
Megjithatë, ai bëri një dallim të qartë mes Luiz Ejllit dhe personave përgjegjës për formatin, duke theksuar se kritika e tij nuk i drejtohet moderatorit.
“Përgjegjësia është e produksionit dhe programacionit dhe jo e Luis Ejllit, i cili s’ka në dorë ndryshime në të tilla raste”, shkroi ai.
Konomi pretendoi se gjatë kohës që publiku po e ndiqte programin si një transmetim të drejtpërdrejtë, në ekran shfaqej herë pas here shënimi “Episod i regjistruar”.
“S’po kuptoj në jemi Live apo është një regjistrim. Mashtrimi i bërë nga televizioni kombëtar është më i madh sesa fakti që jemi apo nuk jemi live”, vijoi ai.
Në fund, Konomi e lidhi kritikën edhe me faktin se e ftuara e episodit ishte Eli Fara, emri i së cilës është vendosur ditët e fundit në qendër të vëmendjes publike. Sipas tij, kjo e bënte edhe më problematike mënyrën e prezantimit të programit.
Deri në momentin e reagimit të Konomit, pamjet e publikuara prej tij tregojnë qartë shënimet “Emision i regjistruar” dhe “Episod i regjistruar”.
Vetë titulli “Live me Luizin”, megjithatë, nuk mjafton në vetvete për të përcaktuar nëse formati është konceptuar si transmetim i drejtpërdrejtë apo nëse fjala “Live” është pjesë e emërtimit të programit.
Comments are closed.