Një video e filmuar në Central Park të Nju Jorkut është bërë virale në rrjetet sociale dhe mund t’i kushtojë dhjetëra milionë dollarë një prej avokatëve më të njohur në SHBA.
Në pamje shfaqet Nathaniel Cullerton, 45 vjeç, partner në firmën prestigjioze ligjore Wachtell, Lipton, Rosen & Katz, duke u puthur me kolegen e tij 29-vjeçare, Kelsey Borenzweig, në një stol të parkut.
Videoja u regjistrua nga një krijues në TikTok, i cili iu drejtua çiftit me fjalët: “Merrni një dhomë, ka fëmijë këtu.” Sapo kuptuan se po filmoheshin, të dy tentuan të fshiheshin nga kamera, por regjistrimi vazhdoi.
Pas publikimit në TikTok, videoja u përhap me shpejtësi dhe përdoruesit identifikuan menjëherë avokatin. Vëmendja u shtua edhe më shumë pasi u raportua se Cullerton është i martuar.
Sipas raportimeve të Financial Times, ai ishte pranë një transferimi te firma rivale Gibson Dunn, një lëvizje që mund t’i siguronte fitime prej dhjetëra milionë dollarësh gjatë karrierës. Megjithatë, oferta thuhet se u tërhoq pasi videoja u bë virale.
Cullerton, i cili fiton të paktën 4 milionë dollarë në vit si partner në firmën aktuale, është vendosur në leje, ndërsa ndaj tij ka nisur një hetim i brendshëm.
Ironikisht, Cullerton dhe Borenzweig kishin punuar së bashku në ekipin ligjor që mbrojti me sukses OpenAI dhe Sam Altman në padinë e ngritur nga Elon Musk.
Ndërkohë, nuk dihet ende nëse marrëdhënia mes tyre ishte deklaruar pranë departamentit të burimeve njerëzore, ndërsa videoja vazhdon të qarkullojë gjerësisht në rrjetet sociale.