Denis Brajoviç, Aldo Gjini dhe Jurgen Zotaj janë tre të dënuarit që u përfshinë në një konflikt paraditen e kësaj të shtune në burgun e sigurisë së lartë në Fier, ku dy prej tyre mbetën të plagosur. Ngjarja ndodhi në ambientet e dhomës së ajrimit, ndërsa fillimisht u raportua se bëhej fjalë për një përplasje mes disa të burgosurve.
Burime bëjnë me dije se bëhet fjalë për një zënkë të momentit mes tre personave, të cilët mësohet se kanë qenë shokë dhe kanë pasur marrëdhënie të mira me njëri-tjetrin. Ende nuk dihet se çfarë ka shkaktuar përplasjen, ndërsa situata ka agravuar deri në përdorimin e mjeteve prerëse.
Gjatë konfliktit, Denis Brajoviç dhe Jurgen Zotaj kanë mbetur të dëmtuar dhe janë dërguar për ndihmë mjekësore në Spitalin Rajonal të Fierit. Pas marrjes së trajtimit, të dy kanë lënë spitalin dhe janë rikthyer në ambientet e burgut.
Pas incidentit, forcat e sigurisë së burgut kanë ndërhyrë për të neutralizuar situatën. Ndërkohë, pritet që grupi hetimor të administrojë edhe pamjet e kamerave të sigurisë për të zbardhur të gjithë dinamikën e sherrit, momentin e nisjes së konfliktit dhe mënyrën se si kanë mbetur të plagosur dy të dënuarit.
Por kush janë tre personat e përfshirë në konfliktin e Fierit?
Denis Brajoviç
Denis Brajoviç është një emër i njohur për drejtësinë shqiptare, ndërsa emri i tij doli në kuadër të hetimeve të SPAK për operacionin “Metamorfoza”.
Brajoviç u arrestua në Emiratet e Bashkuara Arabe në shkurt të vitit 2024, rreth shtatë muaj pasi SPAK e kishte shpallur në kërkim. Arrestimi u realizua pas shkëmbimit të informacioneve mes Interpol Tiranës dhe autoriteteve të Emirateve të Bashkuara Arabe.
37-vjeçari dyshohet nga autoritetet se ka pasur rol në vrasjen e Gjin Ndoj Boriçit, më 9 gusht 2020. Sipas hetimeve, roli i tij në këtë ngjarje u zbulua pas zbërthimit të komunikimeve në aplikacionin “SKY ECC”.
Nga të dhënat e hetimit, sipas SPAK dyshohet se porositës i vrasjes së Boriçit ishte Ervis Martinaj. Ky i fundit, përmes biznesmenit Pëllumb Gjoka, dyshohet se i kishte kërkuar Behar Bajrit që të realizonte ekzekutimin.
Por, sipas hetimeve, Behar Bajri, i cili kishte pasur marrëdhënie shoqërore me Boriçin, ia kishte dhënë porosinë Denis Brajoviçit.
Në këmbim të vrasjes së Boriçit, sipas dosjes hetimore, ishte planifikuar edhe vrasja e Kleant Musabelliut, ngjarje e cila nuk u realizua. Për këtë ekzekutim, sipas hetuesve, kishte interes Pëllumb Gjoka, i cili më herët kishte tentuar ta vriste Musabelliun në vitin 2017.
Brajoviç u ekstradua më pas drejt Shqipërisë, ku vijoi përballjen me drejtësinë shqiptare.
Aldo Gjini
Në konfliktin e sotëm ishte i përfshirë edhe Aldo Gjini, një tjetër emër i njohur për autoritetet dhe që del në hetimet e SPAK kundër një grupi të dyshuar të trafikut të drogës, ku pjesë e grupit dyshohet se ishte edhe djali i ish-deputetit të Partisë Socialiste, Rrahman Rraja.
Gjini nuk është një emër i panjohur për policinë. Pas operacionit të SPAK, atij iu komunikua masa e sigurisë në ambientet e qelisë. Në dosjen e tij figuron edhe një ngjarje e vitit 2021. Më 24 korrik të atij viti, Gjini u përfshi në një konflikt në Tiranë pas një përplasjeje mes dy automjeteve.
Pas “fërkimit” të mjeteve, Gjini u konfliktua me Altin Gjokën dhe Jetmir Marashin, teksa palët tentuan të përcaktonin se kush ishte përgjegjës për përplasjen. Sipas të dhënave të bëra publike për ngjarjen, ata tentuan të shihnin kamerat e sigurisë së një lokali, por debati përfundoi në konflikt verbal dhe më pas në përdorimin e armës.
Gjini dyshohet se qëlloi me pistoletë në drejtim të Gjokës dhe Marashit dhe më pas u largua nga vendi me automjet.
Por dosja e tij nuk përfundon këtu. Aldo Gjini rezulton i shpallur në kërkim ndërkombëtar nga EUROPOL, për akuza që lidhen me tentativë vrasjeje dhe trafikim armësh e municionesh luftarake. Ai dyshohet gjithashtu për një plagosje të ndodhur më 24 nëntor 2020 në Luksemburg.
Në vitin 2016, Gjini ishte arrestuar edhe në Itali, për një çështje që lidhej me shpërndarjen e lëndëve narkotike.