Kreu i Partisë Demokratike, Sali Berisha, ka reaguar pas protestave të studentëve dhe gjimnazistëve, duke dënuar ndërhyrjen e policisë ndaj të rinjve dhe duke kërkuar dorëheqjen e kryeministrit Edi Rama. Ai u ka bërë thirrje nxënësve dhe maturantëve në të gjithë vendin të bojkotojnë mësimin, ndërsa ka kërkuar edhe mbështetjen e mësuesve dhe pedagogëve.
Në deklaratën e tij, Berisha ka akuzuar kryeministrin Rama se ka urdhëruar përdorimin e dhunës ndaj protestuesve, duke e cilësuar reagimin e forcave të rendit si “shtazarak”.
Sipas kreut të opozitës, gjatë ndërhyrjes së policisë ndaj studentëve janë shkaktuar dëmtime të rënda fizike, pretendime për të cilat ai bëri përgjegjës drejtpërdrejt kreun e qeverisë.
Duke shprehur mbështetjen për protestat e të rinjve, kryedemokrati dënoi veprimet e policisë dhe u bëri thirrje nxënësve në të gjithë Shqipërinë të ndërpresin procesin mësimor për t’iu bashkuar tubimeve.
U bëj thirrje të gjithë nxënësve, maturantëve, në mbarë Shqipërinë, të bojkotojnë mësimet, shkollën, për të shpëtuar ëndrrën e tyre më të bukur, për të shpëtuar të ardhmen e tyre, të familjeve, të shoqërisë dhe vendit nga ky zjarrvënës që nuk e kanë parë kohërat”, u shpreh ai.
Berisha iu drejtua gjithashtu mësuesve dhe pedagogëve, duke u kërkuar të qëndrojnë në krah të nxënësve dhe studentëve gjatë protestave.
Në përfundim të deklaratës, Berisha përsëriti kërkesën për largimin e Edi Ramës nga drejtimi i qeverisë, duke paralajmëruar për pasojat e vijimit të qëndrimit të tij në pushtet.
“Edi Rama dogji në flakë dhe zjarr qenien shqiptare. E dëmtoi sa askush tjetër. Në reagimin e tij, pak të thuhet shtazarak, ndaj protestës paqësore të studentëve, theu kocka dhe çau kafka. Si askush tjetër ndaj tyre.
Duke përshëndetur me përzemërsi këtë revoltë çlirimtare për Shqipërinë dhe shqiptarët, dënuam me forcën më të madhe dhunën, terrorin, egërsinë shtazarake të narkobanditëve të urdhëruar nga Edi Rama.
U bëj thirrje të gjithë nxënësve, maturantëve, në mbarë Shqipërinë, të bojkotojnë mësimet, shkollën, për të shpëtuar ëndrrën e tyre më të bukur, për të shpëtuar të ardhmen e tyre, të familjeve, të shoqërisë dhe vendit nga ky zjarrvënës që nuk e kanë parë kohërat.
U bëj thirrje mësuesve, pedagogëve të bashkohen me nxënës dhe studentë. Mos harroni se mësimi i parë, neni i parë është që ata, në çdo rrethanë, duhet të jenë me nxënësit, në anën e tyre.
I kërkojmë Ramës të japë dorëheqjen. Nëse i ka mbetur edhe një arsye njerëzore, të marrë kurajë dhe të japë dorëheqjen, të mos pësojë atë fat që diktatorët që nuk kanë dhënë dorëheqjen kanë mësuar nga verdikti, nga drejtësia e bërë nga qytetarët.”, u shpreh Berisha.
