Deputeti socialist Erion Braçe është i vendosur kundër hartës së re territoriale, pavarësisht ultimatumit të kryeministrit Edi Rama në mbledhjen e grupit parlamentar. Nga foltorja e Kuvendit, Braçe deklaroi se reforma po diktohet nga interesat elektorale dhe se kjo është pranuar hapur gjatë diskutimeve. Ai akuzoi për mungesë transparence, kundërshtoi ministrin Arbjan Mazniku dhe u përball me ndërprerjen e fjalës nga Evis Kushi.
Erion Braçe nuk është tërhequr nga kundërshtimi i reformës territoriale, duke i dhënë një përgjigje të drejtpërdrejtë politike ultimatumit të kryeministrit Edi Rama, i cili në mbledhjen e grupit parlamentar socialist u ka kërkuar deputetëve të votojnë hartën e re, duke paralajmëruar se kush nuk e mbështet duhet të largohet.
Pavarësisht këtij qëndrimi të kryeministrit, Braçe ka marrë fjalën në Kuvend dhe ka kundërshtuar ashpër projektin për shkrirjen e 15 bashkive, duke deklaruar se ndryshimet territoriale nuk janë mbështetur në parime të qëndrueshme, por në llogaritje politike dhe elektorale.
Deputeti socialist ka zbuluar se gjatë diskutimeve për reformën, përfshirë ato të zhvilluara paraditen e sotme, është pranuar hapur se harta e re është produkt i mundësive politike dhe i shumicës së votave.
Braçe e cilësoi të papranueshme që ndryshimet territoriale të varen nga raportet e forcave politike, duke kujtuar se e njëjta praktikë është ndjekur edhe në reformat e mëparshme.
“Harta, e provuar shumë herë, është e përkohshme, e paqëndrueshme dhe si reformë tërësisht e pamjaftueshme. Qëndrueshmëria e reformave nuk vjen nga vota, vjen nga parimet dhe gjerësia e këtyre parimeve”, u shpreh ai.
Deputeti socialist shkoi më tej, duke akuzuar se kriteret e reformës nuk janë zbatuar njësoj në të gjithë territorin dhe se kjo është pranuar pa asnjë rezervë gjatë diskutimeve.
Debati u ashpërsua kur Braçe iu drejtua ministrit të Pushtetit Vendor, Arbjan Mazniku, duke kundërshtuar argumentet e tij se bashkitë nuk kanë përmbushur kompetencat dhe nuk kanë ofruar shërbimet që u takojnë.
“Po flas për kompetencat, Arbër. Të dëgjova edhe më parë, por edhe në vijim, ditë të shkuara, që u referoheshe kompetencave të bashkisë dhe faktit që ato nuk i kanë përmbushur. Nuk ishte korrekt me çfarë the”, iu drejtua Braçe ministrit.
Sipas tij, problemi nuk qëndron vetëm te aftësia e bashkive për të ushtruar kompetencat, por te fakti se qeveria u ka kaluar përgjegjësi pa u siguruar financimin e nevojshëm.
“Po, 46 kompetenca kanë sot bashkitë. Kjo është e vërtetë. Siç është e vërtetë që një pjesë e madhe janë formale, për të mos thënë janë banale. Siç është e vërtetë që këto kompetenca u transferuan pa buxhet apo me buxhet të pamjaftueshëm”, deklaroi ai.
Braçe kërkoi të vijonte me shembuj konkretë nga infrastruktura dhe financimi vendor, por në këtë moment ndërhyri drejtuesja e seancës, Evis Kushi, duke i ndërprerë fjalën me argumentin se kishte përfunduar koha e përcaktuar për diskutimin.
Pjesë nga fjala e Braçes
Harta, e provuar shumë herë, është e përkohshme, e paqëndrueshme dhe, si reformë, tërësisht e pamjaftueshme.
E kam dëgjuar disa herë, veçanërisht sot paradite, se harta është produkt i mundësive politike. Më troç, votave, shumicës që ato krijojnë.
Kështu ka qenë nga 1992-shi, përfshirë dhe atë rastin për të cilin ju fola. Kështu ishte edhe në 2014-ën, ndaj jemi sot këtu. Më e keqja është që këtu jemi edhe sot.
Edhe kjo hartë, e cila, me gjasë, do të ndryshojë edhe një herë, do të marrë fuqi nga 2031-shi, me ndryshimet e fundit. Këtë e mësova sot paradite.
Unë mendoj se qëndrueshmëria e reformave nuk vjen nga vota, nuk vjen nga vota, vjen nga parimet dhe gjerësia e këtyre parimeve.
Parimet janë shkelur. Parimet nuk janë zbatuar njësoj kudo në territorin e vizatuar nga kjo hartë, dhe kjo u tha hapur, edhe pa ndrojtje hiç.
Përse na tolerohet ne kjo?
Ne me këtë ligj sot ndryshojmë jetën e njerëzve në 15 bashki. Nuk ndryshojmë kufijtë administrativë të tyre, po ndryshojmë jetën e njerëzve, madje ndryshojmë jetën e njerëzve edhe në bashkitë e tjera që ato po i përthithin.
Po kaq me lehtësi e marrim ne këtë fakt, ndryshimin e jetës së njerëzve? Të cilët kanë bërë plane për jetën e tyre. Ata që janë më të rinj kanë bërë plane për të ardhmen e tyre, duke përfshirë nga fëmijët e me radhë, shkollimin e tyre.
Që të ndodhë kjo, duhet transparencë. Për të dhënat, për analizat, për aktet, për vendimet. Transparencë efektive quhet.
Jo thjesht hedhje të ca letrave atje mënjanë, po edhe ato kanë munguar.
Transparencë efektive nuk ka pasur, dhe jo për shkak të ndarjes partiake këtu, por edhe brenda një grupi.
Pra, as në nivel grupi, as në nivel profesional grupi, siç janë komisionet parlamentare, siç është Komisioni i Ekonomisë i këtij Kuvendi, kur kriteret që justifikojnë këtë ligj janë thuajse të gjitha me karakter ekonomik dhe financiar.
Mes lumit të informacionit që nuk u nda me ne në një vit, por servirjet në publik, patjetër në funksion të mbështetjes së kësaj harte, do të ishte udhës që informacioni të ishte korrekt.
Po flas për kompetencat, Arbër. Të dëgjova edhe më parë, po edhe në vijim, ditë të shkuara, që u referoheshe kompetencave të bashkisë dhe faktit që ato nuk i kanë përmbushur.
Nuk i kanë shfrytëzuar, përmes tyre nuk kanë ofruar shërbime.
Nuk ishte korrekt me çfarë the.
Po, 46 kompetenca kanë sot bashkitë. Kjo është e vërtetë.
Siç është e vërtetë që një pjesë e madhe janë formale, për të mos thënë janë banale.
Siç është e vërtetë që këto kompetenca u transferuan pa buxhet apo me buxhet të pamjaftueshëm, referuar edhe vlerës së përftuar nga çmimet dhe nga manuali i çmimeve që aplikon vetë qeveria, veçanërisht në infrastrukturë.
Dua t’i lexoj sepse, me thënë të drejtën, i mora i nxitur pikërisht nga përsëritja, përsëritja, përsëritja e këtij argumenti.
Shiko, në infrastrukturë, kompetencat e bashkisë janë prodhimi…
-Kushi i fik mikrofonin
Dikutimet pa mikrofon
Ndërhyn drejtuesja e seancës: Po, faleminderit zoti Braçe.
Braçe: A mund të flas, të lutem? Në qoftë se s’bëjmë këtë, keq më vjen por nuk kemi bërë gjë. Dhe mund të mblidhemi të gjithë këtu e t’i japim këtij emrin e saj, hartës, si të doni.
Ndërhyn drejtuesja e seancës: Zoti Braçe, faleminderit! Ju lutem…
Braçe: Por kjo…
Ndërhyn drejtuesja e seancës: Fjala është për zotin Arjan Ndoja.
Braçe: Por kjo nuk është e tillë! Bëhet e tillë në qoftë se njerëzit e besojnë si të tillë. Mund ta bëjmë me vete atë, por duhet ta besojnë njerëzit këtë! Sepse problemi ynë janë njerëzit! Problemi ynë… problemi ynë nuk janë letrat, janë njerëzit!
Ndërhyn drejtuesja e seancës: Zoti Braçe, ju lutem! Fjalën ia kam dhënë zotit Arjan Ndoja.
Braçe: E fundit gjë… e fundit gjë se nuk do të jetë më pak… E fundit gjë që dua… e fundit gjë që dua të them: E dëgjova me shumë vëmendje argumentin që e gjitha po bëhet për fondet e kohezionit dhe të zhvillimit rajonal të Bashkimit Evropian. Në rregull, po e mendon kush atë që thotë dhe e beson kush atë që thotë? Po si… si mendoni ju që një hartë na bën pjesë automatike të fondeve të kohezionit social të Bashkimit Evropian? Po jo! Unë mendoj që ka kushte, ka me qenë… ka infrastrukturë që duhet të ndërtohet…
Ndërhyn drejtuesja e seancës: Zoti Braçe, ju lutem! Tërheq vëmendjen të lironi foltoren.
Braçe: Dhe vetëm kjo hartë nuk e jep këtë gjë, vetëm kjo hartë nuk e garanton sot, nuk e garanton këtë gjë! Dhe është thelbësore për të kuptuar që gjërat duhet t’i bëjmë vërtet!
Ndërhyn drejtuesja e seancës: Zoti Braçe, po pengoni zhvillimin e seancës! Ju lutem lironi foltoren. Sigurisht që jo… jo… Lironi foltoren…
Braçe: Pra, vetëm kaq nuk mjafton! Do të kisha dashur që një shtet i tërë, një qeveri e tërë, unë besoj se e kishte gjithë mundësinë të kishte sjellë këtu hartën dhe të gjitha kompetencat që i çojnë pushtetit real te qytetari. Të gjitha, pa përjashtim! Dhe që t’i bëjnë ata realisht të ndihen pjesë e një pushteti, ta kenë dhe ata në dorë pushtetin në kufi! Faleminderit!“
Comments are closed.