Pesë persona kanë humbur jetën në një tragjedi familjare në Plant City, Florida. Raportohet se një burrë qëlloi dhe vrau gruan e tij dhe tre fëmijët e tyre të mitur përpara se t’ia kthente armën vetes.
Incidenti ndodhi pasditen e së enjtes, më 19 nëntor, në shtëpinë e familjes në Rrugën Sparkman. Fëmijët ishin vetëm 1, 3 dhe 5 vjeç.
Rasti u zbulua kur Qendra e Reagimit ndaj Emergjencave mori një telefonatë nga brenda banesës në orën 15:29 pasdite sipas orës lokale. Sipas Sherifit të Qarkut Hillsborough, Chad Chronister, telefonuesi fillimisht dëgjoi një zë mashkullor që thoshte “më fal, shoku”, e ndjekur nga një zhurmë e fortë.
Më pas, sipas përshkrimit të sherifit, një fëmijë i vogël u dëgjua duke iu lutur të atit të mos e qëllonte. Policia mbërriti në shtëpi në orën 15:40 pasdite dhe gjeti pesë anëtarët e familjes të vdekur nga plagët e shkaktuara nga armë zjarri.
Sherifi tha se familja kishte jetuar në shtëpi për rreth një vit dhe se gjatë asaj kohe nuk kishte pasur asnjë telefonatë të mëparshme nga policia në pronë. Asnjëri prind nuk kishte një histori të njohur kriminale.
Autoritetet nuk kanë bërë të ditur identitetin e viktimave, ndërsa motivi i tragjedisë familjare nuk është sqaruar ende. Një hetim mbi rrethanat e rastit është duke vazhduar.