Pas një periudhe të gjatë me diell dhe temperatura të larta që i ngjanin një vere të zgjatur, moti ka pësuar një ndryshim të menjëhershëm.
Reshjet e shiut me intensitet të lartë, të shoqëruara me shkarkesa elektrike dhe erëra të forta që arrijnë deri në 65 km/h, kanë përfshirë kryesisht zonat perëndimore dhe veriperëndimore të vendit.
Në një raportim për “Ora News” sinoptikania e Meteoalb Lajda Porja bëri me dije se qytete si Shkodra, Lezha, Tirana dhe Elbasani janë nën ndikimin e rrebesheve, ndërsa temperaturat maksimale kanë pësuar rënie, duke u ndalur në jo më shumë se 24 gradë Celsius.
Dita e shtunë pritet të sjellë një pamje krejtësisht tjetër, duke u ndjerë si një ditë e vërtetë dimri. Edhe pse stuhitë do të zhvendosen drejt jugut dhe reshjet do të pakësohen ndjeshëm, era e ftohtë nga verilindja dhe lagështira e lartë do të bëjnë që i ftohti të ndihet deri në palcë.
Porja paralajmëroi se kjo fundjavë është më e përshtatshme për të qëndruar në shtëpi me veshje të ngrohta, sesa për të frekuentuar bregdetin si fundjavat e kaluara.
Megjithatë, kjo situatë e ftohtë është tërësisht kalimtare. Të dielën, dielli do të rikthehet fuqishëm dhe temperaturat do të rriten sërish në 28 gradë, ndërsa java e re pritet të rikthejë vlerat termike deri në 30 gradë Celsius.
Ndërkohë, parashikimet për muajin tetor tregojnë një panoramë dinamike klimaterike. Për shkak të fenomenit El Nino, tetori do të jetë më i ngrohtë se normalja, por paralelisht do të jetë një muaj mjaft i lagësht. Ditët me diell do të alternohen shpesh me episode dy-ditore rrebeshesh të forta, një lajm mjaft i mirë ky për pastrimin e ajrit dhe përmirësimin e nivelit të ujit në kaskadat e hidrocentraleve veriore.
“Ishte e parashikuar dhe e pritshme që dita e sotme do të jetë me reshje. Megjithatë, është e përkohshme sepse nuk është se do zgjasin shumë ditë. Do jemi sot me reshje, rrebeshe, shkarkesa elektrike, herë pas here në formë shtrëngatash. Kryesisht janë nga perëndimi dhe veriperëndimi.
Zonat e bregdetit do të fillojnë rreth orëve të mesditës dhe pasdites të kenë edhe stuhi të forta ere. Parashikohet një erë 60 apo 65 km në orë dhe me një dallgëzim relativisht mjaft të lartë. Megjithatë, të shtunën mbeten prezente, por në sasi më të pakta, dhe duke filluar nga e diela do të na rikthehet sërish dielli. Ajo çfarë është vënë re, në fakt pothuajse gjatë këtyre tre-katër ditëve, kemi patur freskim të motit.
Sidomos në mëngjes, për të gjithë ata që kanë dalë ose që dalin herët për në punë, është dashur të veshin një xhaketë në orët e para të mëngjesit, pasi temperaturat minimale në zonat malore kanë shënuar edhe 4 apo 5 gradë. Një ditë e ftohtë dhe relativisht e freskët në bregdet dhe zona e ulët, por kanë qenë maksimale të larta.
Sot nuk presim një maksimum të lartë, sot maksimumi do të jetë jo më shumë se 23-24 gradë, nga 28 që është shënuar pothuajse gjatë gjithë javës. Parashikohet që e shtuna nesër të ndihet si një ditë e ftohtë dimri, duke qenë se do jetë prezente lagështira. Temperaturat do jenë pak të ulëta, sidomos në mëngjes.
Nuk ka shumë reshje nesër, por do jetë e freskët dhe relativisht e ftohtë në zonat malore, sado do të duket të shijosh pranë një ambienti të ngrohtë. Megjithatë, të dielën presim përmirësim të motit, do të kemi rritje të temperaturave.
Presim të dielën 28 gradë dhe java tjetër do të shënojë temperatura edhe 30 gradë në fakt. Nuk është se është një situatë e cila do zgjasë, por është një situatë krejtësisht e përkohshme dhe kalimtare. Reshjet më të përqendruara do të jenë në perëndim të territorit dhe përgjatë ultësirës perëndimore. Pra, zonat që do kenë më shumë do të jetë veriperëndimi: Shkodra, Lezha, Tirana, Elbasani, Librazhdi. Do të ketë Kukësi, Peshkopia, dhe zonat e juglindjes, pra Korça, parashikohet t’i ketë reshjet sonte gjatë natës dhe gjatë ditës së shtunë.
Parashikohet në jug, përveç Korçës, të ketë edhe qarku i Vlorës, ku herë pas here reshjet do të jenë me intensitet. Nuk është një situatë për t’u alarmuar, që do të kemi ndonjë përmbytje masive apo problematike, por do të kemi reshje të cilat do të jenë pa diskutim në formë rrebeshi. Të shtunën shumë pak reshje, të dielën me diell dhe e gjithë java tjetër sjell jo vetëm diell, por fillojnë dhe rriten temperaturat. Kemi sërish 28, 29, do jetë dita e hënë që do shënojë dhe 30 gradë, kështu që dielli do jetë prezent, nuk është se u largua”, tha Porja.
BISEDA
Pra, sot që do të vijojnë reshjet dhe nesër, dhe më pas rikthehet dielli të dielën. Pra dy ditë shi na mjaftojnë për ato që na kanë munguar përgjatë gjithë sezonit të verës.
Lajda Porja: Do të thoja që jo krejtësisht e mjaftueshme, por është një situatë e pritshme sepse jo vetëm që pastron ajrin nga e gjithë periudha e gjatë e thatësirave, sjell një përmirësim sado të lehtë për korporatën energjetike pa diskutim, dhe aq më tepër që reshjet janë të fokusuara edhe në zona ku Puka, Kukësi, Peshkopia, ku janë edhe kaskadat që, duke qenë se janë në nivele mjaft kritike… Megjithatë, parashikohet në fakt Lili që tetori t’i ketë akoma më prezente reshjet, sepse shtatori ishte parashikuar që të ishte kryesisht si një muaj vere, duke përjashtuar këto dy-tre ditëshin. Por në tetor, reshjet do jenë prezente. Do kemi patjetër ditë me temperatura të larta në tetor, por do kemi disa episode të tilla që do sjellin edhe reshje. Nuk është se do na mungojnë reshjet përgjatë tetorit apo nëntorit.
Pra do të jetë një tetor më i lagësht sesa ishte shtatori?
Lajda Porja: Po, do të jetë më i ngrohtë patjetër, sepse tetori i ka temperaturat maksimale jo më shumë se 25, por java e parë do të shënojë dhe 27-28. Pra do të jetë më i ngrohtë përsa i përket parametrit klimatik të temperaturave, kjo edhe për shkak të El Ninos që ende është prezent, por do të jetë më i lagësht sepse reshjet do jenë më shumë prezente. Pra do kemi tre-katër ditë me diell, të shkëputura me dy ditë me reshje shiu. Tre-katër ditë me diell, dhe dy ditë shi. Nuk është se do kemi periudha shumë të gjata, dhjetë ditore apo dymbëdhjetë ditore, që të jenë vetëm me diell. Pra do t’i kemi këto shkëputjet me këto episode. Në episodet që do ketë reshje, do ketë mjaftueshëm dhe me intensitet.
Dhe për të sqaruar, Tirana sot do të vijojë përgjatë gjithë ditës me reshje të shiut apo, për të…
Lajda Porja: Tirana në fakt të paktën deri në orën 6 apo 7 të pasdites, do ketë momente ku do ketë ndërprerje, më pas do ketë zhvillime sërish. Pra do ketë reshje herë pas here, një shi i imët por intensiv, dhe herë pas here dhe rrebeshe. Dhe pritet përmirësim në orët e mbrëmjes, pra rreth orës 7, 7 e gjysmë presim që të kemi edhe ndërprerje sepse zhvendosen drejt zonave verilindore reshjet, por mbetet e paqëndrueshme le të themi deri në orët e vona të pasdites. Dhe më pas, duke filluar që nga mbrëmja e sotme, edhe nesër, presim përmirësim të dukshëm. Nesër Tirana mund të ketë pika shiu, ose mund të mos ketë fare, sepse sistemi zhvendoset drejt zonave jugore. Por do të jetë relativisht ftohtë, do ndihet në Tiranë, sepse era është kryesisht nga verilindja, që është një erë mjaft e ftohtë. Lagështira është mjaft e lartë dhe e shtuna do ndihet më shumë si një ditë për t’u shijuar në shtëpi dhe nuk mund të jetë një ditë ideale apo siç kemi frekuentuar bregdetin pothuajse çdo fundjavë të shtatorit.
E qartë. Pra, çadrat me vete sot, dhe madje mos i hiqni as nesër, e madje nesër vishni një xhup më të trashë. Kjo është këshilla.
Lajda Porja: Po, po. Të dielën rikthehen temperaturat dhe rrezet e diellit.
Comments are closed.