Dy drejtues politikë për çdo qark, spastrim i njerëzve të Veliajt, kandidatë bashkish përmes sondazheve dhe votimit nominal, si dhe krijimi i “Këshillit të të Urtëve”. Riformatimi i qeverisë paralajmërohet…
Edi Rama do të mbajë në mbledhjen e Asamblesë së Partisë Socialiste një fjalim të përqendruar te protestat dhe plani i tij për t’u përballur me kundërshtinë publike. Sipas informacioneve, kryeministri nuk do t’i shpallë nesër ndryshimet në qeveri, por do të paralajmërojë riformatimin e kabinetit.
Ndryshimet kryesore pritet të prekin kupolën drejtuese të Partisë Socialiste. Rama do të emërojë numrin dy të partisë dhe drejtuesit e rinj politikë në 12 qarqet. Këtë herë, drejtuesit nuk do të jenë 12, por 24.
Në Tiranë, drejtimin politik pritet ta marrë vetë Edi Rama, i mbështetur nga tre bashkëdrejtues.
Asambleja nuk do t’i shpallë nesër kandidatët për kryetarë bashkie në zgjedhjet e 9 majit. Rama do të paraqesë vetëm procedurën e përzgjedhjes dhe votimit të tyre. Për herë të parë, Asambleja Kombëtare do t’i votojë kandidatët nominalisht, pasi ata të kalojnë një proces që nis nga strukturat socialiste.
Organizatat e PS-së do të diskutojnë dhe propozojnë emrat, të cilët më pas do t’u nënshtrohen sondazheve. Dy kandidatët me mbështetjen më të lartë në publik do t’i paraqiten Asamblesë, e cila do të zgjedhë njërin prej tyre.
Ndërkohë, Rama nuk pritet të merret drejtpërdrejt me Erion Veliajn, por do ta riorganizojë nga themelet strukturën e PS-së në Tiranë. Plani parashikon largimin e njerëzve që Veliaj ka vendosur në njësitë bashkiake të kryeqytetit.
Sipas informacioneve, Plarent Ndreca do të jetë një nga të paktët që do të ruajë drejtimin politik, konkretisht në Njësinë 13.
Në Njësinë 10, Besfort Lamallari ia ka zbehur prej kohësh rolin Fatmir Xhafajt. Ndërsa njerëzit e emëruar nga Veliaj nuk pritet të kenë më funksione politike. Strukturat kanë rikthyer në detyrat partiake disa prej personave që kryebashkiaku kishte larguar, duke nisur nga Florian Pullazi në Njësinë 1, deri te ish-drejtuesi i Njësisë 5.
Pikërisht në Njësinë 5, Edi Rama pritet të vendosë Erion Braçen. Kryeministri ka diskutuar me ish-zëvendëskryeministrin për një rol të ri politik, i cili mund ta bindë Braçen të heqë dorë nga ambicia për të kandiduar për Bashkinë e Tiranës.
Rama pritet të flasë në Asamble edhe për rolin e ri të Braçes dhe disa deputetëve të tjerë. Në këtë kuadër, PS-ja do të krijojë edhe “Këshillin e të Urtëve”, një strukturë ku do të përfshihen socialistët e vjetër.
Ky këshill do të funksionojë si grup politik këshillimor. Qëndrimet dhe propozimet e tij do t’i kalojnë Asamblesë për diskutim dhe votim.
PS-ja pritet ta sanksionojë “Këshillin e të Urtëve” në statut. Përveç rolit këshillimor, anëtarët e tij do të përfaqësojnë partinë në mediat kombëtare, ku do të komentojnë politikat e mazhorancës dhe alternativat për zgjidhjen e problemeve.
Në këtë organizëm do të marrin pjesë edhe Edi Rama, sekretari i përgjithshëm i PS-së dhe kryetari i grupit parlamentar./Pamfleti
