Detaje të reja janë bërë publike mbi profilin e Violand Braçellarit, 43-vjeçarit që dyshohet se vrau efektivin e Policisë së Shtetit, Enea Mekolli, dhe plagosi kolegun e tij, Edison Adri, gjatë operacionit të zhvilluar në zonën e Lozhanit.
Duke raportuar në emisionin “Off the Record” në A2 CNN, gazetari Artin Halili tha se policia kishte siguruar informacione operative për vendndodhjen e 43-vjeçarit në malin e Bodes, ku prej vitesh ai jetonte në një kompleks stallash të ngritura prej tij.
“Policia e Korçës kishte marrë informacion në rrugë operative se shtetasi 43-vjeçar Violand Braçellari ndodhej në stan në malin e Bodes, të fshatit Lozhan. Brenda disa orësh kanë organizuar një plan pune për të shkuar dhe për të bërë të mundur arrestimin e tij. Më pas ndodhi edhe ajo çfarë ndodhi, duke lënë pas një viktimë, Enea Mekolli, polic i ‘Shqiponjave’ dhe i plagosur kolegu i tij, Edison Adri”, deklaroi Halili.
Related article Obama Judge Dismisses Request For Jan. 6 Restitution Refund
Sipas gazetarit, Braçellari rezultonte prej rreth një dekade në kërkim dhe për kapjen e tij ishin zhvilluar më herët disa operacione policore.
“Ai është prej 10 vitesh në kërkim nga Policia e Korçës. Ka pasur disa aksione të forcave RENEA për të bërë arrestimin e tij. Nuk ishte kërkuar ndihmë nga RENEA për ndërhyrjen. Ai kishte disa vite që ndodhej atje në stan. Ai kishte ngritur një kompleks stallash. Kishte kohë që jetonte aty me nënën e vet. Duhet theksuar që s’ka qenë aq shumë i fshehur saqë policia mos kishte informacion”, u shpreh gazetari.
Halili zbuloi gjithashtu një episod të ndodhur dy vite më parë, kur sipas tij 43-vjeçari kishte dhunuar rëndë një bari të zonës pas dyshimeve se ky i fundit kishte shkaktuar një zjarr në mal.
“Para dy vitesh ka rënë një zjarr masiv në malin e Bodes. Në këtë periudhë është shfaqur Braçellari. Në këtë periudhë ai ka dhunuar një tjetër bari të zonës, që sipas të dhënave që kemi siguruar, jo vetëm e ka dhunuar fizikisht, por për një orë e ka tërhequr zvarrë nëpër pyll, me kalin e vet, pasi mendonte se bariu i kishte vendosur flakën pyllit. Më pas është gjetur i lidhur në një pemë”, tha Halili.
Ngjarja ku mbeti i vrarë efektivi Enea Mekolli dhe u plagos një tjetër punonjës policie ka tronditur opinionin publik, ndërsa hetimet vijojnë për zbardhjen e plotë të rrethanave të operacionit dhe dinamikës së përplasjes me 43-vjeçarin.
Comments are closed.