Arjan Konomi ka publikuar një video në Instagram, përmes së cilës pretendon se është dhunuar fizikisht nga disa persona pranë banesës së tij.
Në një reagim të ashpër, ai ka akuzuar persona që i cilëson si të afërm të Linda Ramës, bashkëshortes së kryeministrit Edi Rama.
Sipas rrëfimit të Konomit, ngjarja ka ndodhur gjatë natës, në një lokal poshtë banesës së tij, ku disa persona fillimisht i janë afruar me pretendimin se dëshironin të sqaronin një çështje me të.
“Si guxon të dërgosh kushërinjtë e tu të më zënë pritë mua natën poshtë banesës sime dhe të më qëllojnë me grushta?”, shprehet ai në video, duke iu drejtuar Linda Ramës.
Konomi pretendon se personat në fjalë janë ulur fillimisht në tavolinë me të, por më pas janë ngritur dhe e kanë goditur.
“Më futën në kurth, se thanë ‘do sqarohemi dhe do flasim pak’. Pastaj u ulën në tavolinë me mua, morën dhe gotën dhe u ngritën dhe më qëlluan”, rrëfen ai.
Ai thotë gjithashtu se incidenti ka ndodhur në prani të njerëzve të tjerë dhe kamerave të sigurisë, ndërsa pretendon se ka marrë edhe kërcënime me jetë.
“Njerëz që më kërcënojnë mua se do më vrasin po dola në Evropë”, deklaron Konomi, duke shtuar se nuk kishte përjetuar më parë një situatë të tillë.
Gjatë videos, ai përdor një gjuhë të ashpër ndaj Linda dhe Edi Ramës, duke i lidhur akuzat e tij me një pakënaqësi të pretenduar të familjarëve të bashkëshortes së kryeministrit.
