Presidenti amerikan Donald Trump ka njoftuar ndalimin e hyrjes në Shtetet e Bashkuara për shtetasit e 12 vendeve, me qëllim — sipas tij — të “mbrojtjes së vendit nga terroristë të huaj”. Lajmi është bërë publik të mërkurën nga Shtëpia e Bardhë, përmes një dokumenti zyrtar.
Masa do të hyjë në fuqi të hënën, më 9 qershor, dhe prek shtetasit nga: Afganistani, Mianmari, Çadi, Republika Demokratike e Kongos, Guinea Ekuatoriale, Eritrea, Haiti, Irani, Libia, Somalia, Sudani dhe Jemeni.
Paralelisht, SHBA do të vendosë kufizime shumë të rrepta për shtetasit e shtatë vendeve të tjera: Burundi, Kuba, Laosi, Sierra Leone, Togo, Turkmenistani dhe Venezuela.
Sipas presidentit Trump, vendimi vjen si përgjigje ndaj një sulmi të ndodhur të dielën në shtetin e Kolorados, ku një person hodhi mjete zjarrvënëse mbi pjesëmarrësit e një marshimi që shprehnin mbështetje për pengjet izraelite të mbajtura në Rripin e Gazës. Sipas Shtëpisë së Bardhë, autori i dyshuar i sulmit ndodhej në SHBA në mënyrë të paligjshme.
