Një situatë e rëndë ka ndodhur rreth një muaj më parë në Durrës, ku drejtori i Policisë së Fushë Krujës është dhunuar nga një qytetar, pas një konflikti që kanë pasur në lidhje me qarkullimin në rrugë. Elton Shahini ka qenë duke lëvizur me motor, në momentin kur një qytetar me të cilin po konfliktohet zbret nga makina dhe e qëllon me pëllëmbë, pas një konflikti verbal të ndodhur fillimisht mes tyre. Ngjarja është bërë publike nga ish-deputeti Myslim Murrizi, i cili thotë se shteti ka degraduar, pavarësisht arsyeve mbi të cilat ka ndodhur konflikti.
Në video dëgjohet që Shahini e shan qytetarin, dhe më pas ky i fundit sapo zbret nga makina i drejtohet shefit të policisë me fjalët: kë shan nga roptë ti!
SHEKULLI kontaktoi dhe me drejtorinë e Policisë së Durrësit, por konflikti në fjalë nuk ishte referuar nga ana e Shahinit, dhe duket se çështja është zgjidhur personalisht me qytetarin e përfshirë në konflikt.
POSTIMI
Kjo video tregon se ku është katandisur shteti.
Ky me motor, të cilin e rrahin në mes të rrugës në Durrës, para një muaji, “si gomarin në duhan”, është shefi i Komisariatit të Krujës, Elton Shahini, dhe ish-shef i Komisariatit Nr. 1 në Tiranë.
Ky që e rreh, siç duket, duhet të ketë “të drejtë”, se ndoshta i ka zënë rrugën, ose mund ta ketë “vartës”, nëse ky që e rreh është pjesë e “strukturave” që e kanë emëruar.
Ndoshta është edhe oficer i SHISH-it, të drejtuar nga Vlora Hyseni, dhe ka marrë “urdhër” që t’ia fikë “radarin” shefit të Komisariatit të Krujës.
Ehhh, ku jemi katandisur!
Kur rrihet në mes të rrugës një shef komisariati, vaj medet çfarë sigurie do t’u ofrojë kjo polici qytetarëve.
Dhe jo vetëm e ka rrahur, por, siç duket, nuk e ka lënë as të bëjë denoncim.
Bela e madhe kur je i emëruar dhe i promovuar nga klane të pista apo bota e krimit: edhe të rrahin, edhe nuk të lënë të “qash”.
Me siguri, SHISH-i i Durrësit duhet të ketë “bërë” raport për këtë ngjarje “argëtuese” për qytetarët që ishin të pranishëm aty, në këtë moment “pikant”.
Comments are closed.