Një oficer policie është vrarë dhe një tjetër ka mbetur i plagosur rëndë pas një sulmi me armë zjarri në Filadelfian Perëndimore, në SHBA.
Ngjarja ndodhi teksa dy efektivët po i përgjigjeshin një telefonate për një person të armatosur. Oficeri i vrarë është identifikuar si Shane Sieber, 40 vjeç, baba i dy fëmijëve, i cili shërbente prej 10 vitesh në radhët e policisë.
Ai u qëllua tri herë dhe ndërroi jetë në spital, si pasojë e plagëve të marra. Ndërkohë, kolegu i tij 33-vjeçar u qëllua 12 herë dhe iu nënshtrua një ndërhyrjeje kirurgjikale, por ndodhet në gjendje të qëndrueshme.
Sipas raportimeve të mediave amerikane, efektivët mbërritën në zonë pas njoftimit për një person që mbante armë.
Kur u afruan në verandën e një banese, një person hapi zjarr ndaj tyre, duke i plagosur të dy.
Pas kontrolleve në zonën përreth, autoritetet arrestuan një punonjës të shërbimit të ujësjellësit të Filadelfias, i cili dyshohet për përfshirje në ngjarje. Hetimet vijojnë për të zbardhur plotësisht rrethanat e sulmit.
Comments are closed.