Një ngjarje e rëndë ka ndodhur pasditen e sotme në Portin e Durrësit (28 korrik).
Një shofer kamioni që priste radhën për përpunim në pikën doganore, aksidentalisht ka goditur për vdekje një nga kolegët që gjithashtu drejtonte kamion dhe po shkonte të dorëzonte dokumentacionin në skaner për përpunim.
“Në Portin e Durrësit, në sheshin para skanerit, shtetasi N. M., 49 vjeç, banues në Berat, duke drejtuar një kamion, dyshohet se aksidentalisht ka goditur shtetasin N. Sh., 62 vjeç, banues në Kosovë, drejtues i një kamioni tjetër, i cili po lëvizte në këmbë për të dorëzuar dokumentacionin e kamionit të tij për t’u futur në skaner”, thanë burime zyrtare për ngjarjen.
Si pasojë e goditjes, shtetasi N. Sh., 62 vjeç, ka humbur jetën. Kurse shoferi N. M., u shoqërua në Komisariat dhe po kryhen veprimet procedurale.
Grupi hetimor, nën drejtimin e Prokurorisë, po punon për zbardhjen e rrethanave të aksidentit.
