Një lajm i trishtë vjen mëngjesin e sotëm ku mësohet se Elvis Karaj, menaxheri dhe drejtuesi i spitalit AMAVITA është ndarë nga jeta krejt papritur, në kulmin e punës dhe karrierës, në moshën 48 vjeçare.
Djali I mjekut të njohur Agim Karaj sipas informacioneve të para ka pësuar arrest kardiak duke mbyllur përfundimisht sytë e duke lënë një dhimbje e boshllëk të madh për bashkëshorten, fëmijët, familjarët por edhe gjithë miqtë e panumërt kudo në Shqipëri e jashtë saj, mjekë, infermierë, doktorë, të gjithë ata me të cilët bashkëpunoi.
Ka qenë e pamundur ndihma për vetë drejtuesin e spitalit, pavarësisht përpjekjeve të para. Kushdo që është gdhirë këtë mëngjes me këtë lajm, është ndjerë I pafuqishëm për ta përtypur si informacion, ndërsa dhimbja që lë pas dhe boshllëku I krijuar është I pabesueshëm.
Elvis Karaj dhe Spitali Amavita kanë qenë prej vitesh bashkëpunëtorë të afërt të medias Neësbomb.al. Ndër suportuesit kryesorë të saj, për shkak të vizionit të Visit, avangardë dhe krejt në pararojë me zhvillimet e kohës.
Newsbomb.al i shpreh ngushëllimet familjarëve, miqve dhe shokëve të tij të panumërt. I përjetshëm qoftë kujtimi i tij.
Reagimi i Spitalit AMAVITA:
Me dhimbjen që nuk shkruhet dot me fjalë, njoftojmë ndarjen nga jeta të Elvisit tonë të dashur, në moshën 48 vjeç.
Ishte njeriu që ishte aty për këdo, kurdo. Kush e njohu, e di sa e vështirë është ta thuash këtë lajm.
Pritja dhe përcjellja bëhet tek Funeral Home “Univers”, Rruga Bardhyl, përballë Postës Shqiptare nr. 32.
Ceremonia e varrimit zhvillohet ditën e premte, më 31 korrik 2026, me varrim në orën 11:00 në Tufinë. Dreka bëhet tek Restorant “Dollia 2”, Rruga Bardhyl.
Vizitat priten ditën e shtunë dhe të diel, më 1 dhe 2 gusht, nga ora 09:00 deri në 19:00.
Faleminderit të gjithëve që do të jenë pranë nesh këto ditë.