Avokati Saimir Vishaj ishte i ftuar në emisionin “Mes Drite” në Vizion Plus, ku dha një rrëfim të gjatë mbi jetën e tij personale, sfidat shëndetësore dhe reflektimet për sistemin e drejtësisë në Shqipëri.
Gjatë intervistës, Vishaj u ndal gjerësisht te beteja e tij me sëmundjen e rëndë, duke treguar momentet më kritike të jetës. “Kam përballuar tre kimioterapi dhe tre gjendje kome, ku isha gati i vdekur. Jam ngjallur, mbase sepse i kam zbatuar me përpjekje të gjitha rekomandimet e mjekëve,” u shpreh ai. Sipas tij, përballja me sëmundjen i ka ndryshuar tërësisht mënyrën e të jetuarit dhe të menduarit.
Përpara sëmundjes isha shumë aktiv, punoja nga ora 7 e mëngjesit deri në 10 të natës dhe mbartja stresin e të gjithë njerëzve që mbroja. Ky stres, mbase edhe ushqimi jo i mirë, cigarja apo pija e tepërt, bënë që pas 40 vitesh të rrëzohesha në tokë në gjendje kome. Zoti më shpëtoi në sekondat e fundit, kur mjekët ishin gati të më hiqnin tubat.
Ishte një luftë midis jetës dhe vdekjes, dhe jeta fitoi. Gjatë komës, unë dëgjoja çdo gjë qartë, ndjeja njerëzit afër, por nuk reagoja dot. Shihja të rinj 18 apo 25 vjeç që vdisnin brenda pak ditësh në spital, dhe kjo më trembte, por ndihesha i fortë për ta përballuar. Hallucinacionet nga medikamentet bënin punën e tyre, por unë doja të rikthehesha në profesionin tim. Për gjashtë muaj qëndrova i shtrirë, por mjekët me anë të fizioterapisë më ngritën në këmbë.
Në Itali më ka qëndruar pranë gruaja, por shumë njerëz u larguan. Kam ndjerë zhgënjim, por nuk mbaj mëri sepse nuk dua ta stresoj veten. Sot jam shumë mirë, kam kapur ritmin e jetës dhe rezultatet në avokati më motivojnë. Kam vendosur edhe kandidaturën për Dhomën e Avokatisë për të dhënë shembullin tim, ndonëse intrigat këtu janë të tmerrshme. Tani e nis jetën në orën 6 të mëngjesit me fizkulturë, fizioterapi dhe dietë rigoroze.
Mundohem të jem i qetë, sepse qetësia është pjesë e shërimit. I buzëqesh jetës, edhe kur jam i mërzitur, sepse dua ta shijoj këtë pjesë të mbetur të saj. Për djemtë uroj më të mirën, por më dhimbset që investimin e tyre po e japin jashtë sepse këtu nuk ka siguri nga “bandat qeveritare” dhe gjobëvënia. Mesazhi im për këdo: shijojeni jetën me të mirat dhe të këqijat e saj. Kini dashuri për familjen, ajo është mbi gjithçka. Miqësia të jetë e pastër dhe pa interes. Dilni në natyrë për t’u relaksuar dhe për të larguar lodhjen e javës”, tregoi avokati.
Comments are closed.